بایاتی

گۆلومو شاختا ووردو،
نه یامان واختا ووردو.
یاریم منی وورموشدو،
اۆستوندن خالق دا ووردو.

داغدان گلن سودومو؟
داش-تورپاغی یودومو؟
وعده وئردین، گلمه‌دین،
اعتیبارین بودومو؟

منی بیر آری ووردو،
دیمدیگی ساری ووردو.
آری بئله وورمازدی،
گؤیده‌کی تاری ووردو.

داغدا چیسکین اولورمو؟
دومان چیسکین اولورمو؟
آغلار گؤزوم، چوخ آغلا،
بوندان پیس گۆن اولورمو؟

فلک منه داش ووردو،
داشین آتدی، چاش ووردو.
قانلی غم دریاسینا
یار دا گلدی باش ووردو.

من عاشیقم آل اوخو،
چک، سداغدان آل اوخو.
قان یاش ایله یازیلمیش،
بیر عرضه‌می آل اوخو.

دورنام گؤیده دۆز دوردو،
قاتارلاندی، دۆز دوردو.
من یارا خوش سؤز دئدیم،
او، پیس یئره یوزدوردو.

درد منده اۆز گؤروبدو،
مئیدانی دۆز گؤروبدو.
گئدیر، گئدیر، قاییدیر،
منی یالقیز گؤروبدو.

عزیزیم تالان بودو،
ایندی چک، بلان بودو.
درددن ساوای نییم وار،
منه ده قالان بودو.

کاروان یولا دۆزولدو،
خومار گؤزلر سۆزولدو.
نئجه من آغلاماییم،
الیم یاردان اۆزولدو.

یئتیمم، آتام یوخدو،
بۆلبولم، بوتام یوخدو.
دۆشدوم غم دریاسینا،
الیمدن توتان یوخدو.

عزیزیم یارا دؤندو،
ملهمدن یارا دؤندو.
ایسته‌دیم بوینون قوجام،
زۆلفون شاهمارا دؤندو.

داغ باشینی سار گؤردو،
گؤز قاماشدی، تار گؤردو
جفاسینی من چکدیم،
صفاسین اغیار گؤردو.

ائله‌می یاری گۆنو،
آغلادیم یاری گۆنو.
من فلکه نئیله‌دیم،
گؤرمه‌دیم تاری گۆنو.

قاراباغین سؤیودو،
من گلنده گؤی ایدی.
سن کی بئله دئییلدین،
کیمدن آلدین اؤیودو؟

من عاشیق گؤزل گۆنو،
گؤزلین گؤزل گۆنو.
دؤزدوم هر بیر ظۆلمونه،
گؤزله‌دیم گؤزل گۆنو.

داغدان ائنن سۆرودو،
داغی دومان بۆرودو.
وفاسیز یار یولوندا
جاوان عؤمروم چۆرودو.

گؤره‌سن گؤزل گۆنو،
گؤزلده گؤزل گۆنو.
اؤزومو بدبخت ائتدیم،
من آلدیم گؤزل گۆنو.

قار گلدی، داغا دۆشدو،
خار قوندو، باغا دۆشدو.
ازل باشدا گزن یار
گلدی آیاغا دۆشدو.

داغا قار دۆشن گۆنو،
اۆرگیم بیشن گۆنو.
یار منه داغ اۆستوندن
داغ چکدی نیشان گۆنو.