بایاتی

یاغیش یاغدی، یای اولدو،
گؤیده اولدوز سای اولدو.
جفا چکدیم، یار سئودیم،
منه قالان «وای» اولدو.

یار دئدیم، یالان اولدو،
عؤمرومه تالان اولدو.
هامی یاردان یاریدی،
منیمکی یالان اولدو.

درد وئرن فلک اولدو،
هر ایشی کلک اولدو.
منی بو درده سالان
بیر نازلی ملک اولدو.

ائو تیکدیم، یالان اولدو،
گۆل عؤمروم تالان اولدو.
نه چوبوغوم برکیدن،
نه کئچم سالان اولدو.

باغلار باشی تئل اولدو،
یئل اسدی تئل-تئل اولدو.
بی‌وفا یار اوجوندان
گؤزوم یاشی سئل اولدو.

دۆز قدّیم کامان اولدو،
احوالیم یامان اولدو.
یاندیردی یار کؤنلومو،
آهیمدان دومان اولدو.

سن گئدن بیر ایل اولدو،
باغلار یاندی، گۆل اولدو.
وعده وئردین، گلمه‌دین،
بو نه یامان دیل اولدو.

قره‌نفیل دن-دن اولدو،
درمه‌دیم، خندن اولدو.
من سندن آیریلمازدیم،
آیریلیق سندن اولدو.

عزیزیم واغام اولدو،
گۆللرین واغام اولدو.
ائوین یؽخیلسین فلک،
نؤکریم آغام اولدو.

قؽزیلگول دن-دن اولدو،
درمه‌دیم، دن-دن اولدو.
من عهده وفالی‌یام،
بو حسرت سندن اولدو.

بو داغلار داشیم اولدو،
سیریم-سیرداشیم اولدو.
منه تسلّی وئرن
یئنه گؤز یاشیم اولدو.

یئتیم یئترگین اولدو،
سؤزو بیترگین اولدو.
یئتیمه کج باخدیلار،
ایتدی، دیدرگین اولدو.

بوخاری قوروم اولدو،
یاندیقجا قوروم اولدو.
هامی‌نین بیر دردی وار،
منه چوخ ظولوم اولدو.

داغدا چن توتقون اولدو،
گلدین سن، توتقون اولدو.
ندندی کی، اۆرگیم
گۆن-گۆندن توتقون اولدو؟

داغلار باشی قان اولدو،
چن گلدی، دومان اولدو.
یار مندن اۆز دؤندردی،
دردیم بیر اۆممان اولدو.

داغلار باشی قار اولدو،
بولود گلدی، تار اولدو.
دۆنیا منیم باشیما
ندن بئله دار اولدو؟

دورنام گؤیده اۆچ اولدو،
سیرملندی، اۆچ اولدو.
زورلا اره وئردیلر،
جاوان عؤمروم پوچ اولدو.

بوردا یارالی چوخدو،
گؤیلو-قارالی چوخدو.
بوستانی شیرنک ووروب،
تاغی یارالی چوخدو.

بو گۆلو شاختا ووردو،
نه یامان واختا ووردو.
بیموروت دۆشمان منی
دوستدان ایراخدا ووردو.

گئدیردیم یاستی یولو،
سو گلدی باسدی یولو.
غۆربت ائلدن قاچیردیم،
نامردلر کسدی یولو.