بایاتی

صیّاد، الده کاماندیر،
اوخون آتما، آماندیر.
یاری اینتیظار قویان،
یار دئییل، پیس زاماندیر.

او دا منی یاندیریر،
بو دا منی یاندیریر.
سویوندوم، سویا دۆشدوم،
سو دا منی یاندیریر.

داغلار باشی دوماندیر،
ائلین حالی یاماندیر.
دؤران بئله دگیشیب،
بلکه آخیر زاماندیر؟

منی جانیم یاندیریر،
قاینار قانیم یاندیریر.
عالمی اود یاندیرسا،
منی خانیم یاندیریر.

بابانین هرایی گؤر،
هر هفته، هر آیی گؤر.
یؽخیلمیش، ویران اولموش،
عؤمرونون سارایی گؤر.

عزیزیم یارام یوخدور،
غم ایله آرام یوخدور.
دردیم سنین دردیندی،
کیمسه‌دن یارام یوخدور.

سن منیم باختیمی گؤر،
قؽزیلدان تاختیمی گؤر.
اۆز دؤندریب گئدن یار،
بیر بری باخدیمی، گؤر؟!

یئتیمم، آتام یوخدور،
غریبه‌م، بوتام یوخدور.
دۆشدوم غم دریاسینا،
قولومدان توتان یوخدور.

آپار منی بنده وور،
زۆلفوننن کمنده وور.
مین یارا دؤران ووروب،
اسیرگه‌مه، سن ده وور.

آشیق بیر ایز گؤروبدور،
مئیدانی دۆز گؤروبدور.
ظۆلم ائتمکدن دویماییر،
منی یالقیز گؤروبدور.

من عاشیقم یالدا دور،
گؤر دۆنیا نه حالدادیر.
کیمی جؽر-جؽندیر تاپمیر،
کیمی گئییب شالدادیر.

گۆل وئردیم، یانا قویدو،
سؤزو پۆنهانا قویدو.
من غۆربتده اؤلورم،
یار ائوده هانا قویدو.

سونام سۆزن اولوبدور،
گؤلده اۆزه‌ن اولوبدور.
درد-غم گؤرمه‌ین جانیم
درده دؤزن اولوبدور.

آتلیلار کنده دولدو،
سو گلدی، بنده دولدو.
نه قدر دردلی گلسه،
درمانی منده بولدو.

گئدیرم، یولوم بودور،
باشیما ظۆلوم بودور.
یار سئویب، یئرده قالماق،
اجلسیز اؤلوم بودور.

باغچالاردا یاز اولدو،
بۆلبول، دردین آز اولدو.
اوخو دئدیم، آغلادین،
بو نئجه آواز اولدو؟

داغلاردا قالان بودور،
داغا سس سالان بودور.
بلا چکمه‌ین باشیم،
چک ایندی بلان بودور.

آراز باشدان آز اولدو،
اؤردک ووردوم قاز اولدو.
گۆجیلن بیر یار تاپدیم،
او دا کلکباز اولدو.

آنام اوزان اولوبدور،
درده دؤزن اولوبدور.
حاقدان باغلانان دیلیم
عرضه یازان اولوبدور.

آرپا بیچدیم، درز اولدو،
سؤزوم خانا عرض اولدو.
یاردان بیر خبر گلدی،
اؤلوم منه فرض اولدو.