بایاتی

عزیزی‌یم گۆل اللر،
شانا بارماق، گۆل اللر.
دریاجان آغلین اولسا،
یوخسول اولسان گۆلللر.

دییرمان بئله ایشلر،
توولانیب بئله ایشلر.
چکمه‌میش منیم باشیم
گؤر چکیر بئله ایشلر.

قؽزیلگولو دررلر،
یایلیق اۆسته سررلر.
آرالیقدا چوغول وار،
سنی مندن ائلرلر.

شیرمایی تئله ایشلر،
دییرمان ائله ایشلر.
هئچ کافرین باشینا
گلمه‌سین بئله ایشلر.

قؽزیلگولو دررلر،
هشم اۆسته سررلر.
رنگیمی یار سارالدیب،
قؽزدیرمادان گؤررلر.

ائله‌می قالدی صبیر،
غوغادی، قالدی صبیر.
نه یار اینصافا گلدی،
نه منده قالدی صبیر.

اوبا قالخدی، کؤچرلر،
کؤچو کؤچدن سئچرلر.
یئتیمین گؤز یاشیندان
کؤرپو سالیب کئچرلر.

تنبکیم تۆکنیبدیر،
چکمه‌یه تۆکنیبدیر.
خوبلوغون گئتدی، عاشیق،
اۆزونه تۆک انیبدیر.

نوخودا از وئریرلر،
الیمه ساز وئریرلر.
دۆشدوم درمانسیز درده،
درمانیم آز وئریرلر.

بولود گلیر، چن گئدیر،
بیر-بیری‌یله تن گئدیر.
گلیب کئچن بو گۆنلر
بیر-بیر عؤموردن گئدیر.

آراز آخار، یان وئرر،
سسی منه جان وئرر.
یارامی مؤحکم باغلا،
باغلاماسان قان وئرر.

باشیندا شالین ندیر،
دانیش، خیالین ندیر؟
یانیمدان اؤتوب کئچیب،
دئمیرلر حالین ندیر؟

بو عاشیق غم اریدیر،
آی اۆزون قمریدیر.
آتی مهمیز اؤلدورور،
ایگیدی غم اریدیر.

عزیزیم نه میندیریر،
نه سالیر، نه میندیریر.
دردلینی دیندیرمه‌یین،
درد اونسوز دا دیندیریر.

دردیم واردی ندندیر،
سبب او گۆلبه‌دندیر.
منیم قانلیم فلک یوخ،
سنی مندن ائدندیر.

یارین مئیلی یادادیر،
سؤز دئمه‌یین قادادیر.
هامی‌نین بیر دردی وار،
منیمکی ضیادادیر.

قؽزیلگول هاچا بنددیر،
سانا گؤر نئچه بنددیر.
بیر درده دۆشموشم کی،
عؤمروم بیر هئچه بنددیر.

یارین اؤزو قارادیر،
قاش-گؤزو قارادیر.
یوخسول قوناق ایسته‌مز،
چۆنکی اۆزوقارادیر.

ایش قالسا مجلدندیر،
داغ دؤشو قجلدندیر.
یئتیمی درد اؤلدورسه،
دئیرلر اجلدندیر.

باشیندا شال خارادیر،
گئدیر، یولو هارادیر؟
یاریم بی‌وفا چؽخیب،
گؤر گۆنوم نه قارادیر.