بایاتی

بیکه‌سم، گۆله داملار،
گؤز یاشیم گۆله داملار.
دۆنیا یئنیلسه یئگدیر
سولونجا گۆل آداملار.

اززی‌یم دامار-دامار،
گؤی اۆزو دامار-دامار.
کسم دۆشمن دیلینی،
دوغرایام دامار-دامار.

ائله‌می آجی داملار،
ایتیریب آجی داملار.
شاه یانینا گئدنین
گؤزوندن آجی داملار.

عزیزیم دامار-دامار،
صیفتیندن قان دامار.
شیشه کؤنلوم سؽنارسا،
بس اونو کیمیم یامار؟

گؤزله، زۆلفون باد وورار،
باد الیندن داد وورار.
درددن آمان دئیه‌نین
بوینونو جلّاد وورار.

داغ باشیندا سار گئدر،
ترلانی بوسار گئدر.
زهلم گئدر او یاردان،
هر گئجه کۆسر گئدر.

عاشیق هارایا چاتار،
اوغول هارایا چاتار.
بو ایش الله امریدی،
هارای هارایا چاتار.

یامان گۆن کئچر گئدر،
عؤمرومو بیچر گئدر.
دۆنیادا غم شربتین
هر گلن ایچر گئدر.

گۆنلر هر آیا چاتار،
گلر هر آیا چاتار.
باشیم جلّاد الینده،
الیم هارایا چاتار؟!

الینده فانار گزر،
گزدیکجه یانار گزر.
بیر کس کی یوخسول اولسا،
دوست اوندان کنار گزر.

عزیزینم نه باهار،
نه قؽش، نه یاز، نه باهار.
زحمتی بۆلبول چکدی،
گۆلو قوجدو یئنه خار.

عزیزیم گۆله بنزر،
قؤنچه‌یه، گۆله بنزر.
یاردان گیلئیلنن یار
دردلی بۆلبوله بنزر.

قاتئق داشار، کۆر داشار،
چؽخیب کؤرپودن آشار.
من دردیمی دانیشسام،
داغلار، داشلار آغلاشار.

اوخون یئتیمه دگر،
آتما، یئتیمه دگر.
آچما یئتیم آغزینی،
یئتیم یئتیمه دگر.

قلیانی چکه‌نه وئر،
دولدوروب چکه‌نه وئر.
بو دردی چکممنم،
آپار گئت، چکه‌نه وئر.

عزیزینم باش ایر،
یولو بو داغ، داش ایر.
زامان نئجه زاماندی،
مرد نامرده باش ایر.

اززیم گئجه‌دن گئدر،
کاروان گئجه‌دن گئدر.
گئجه اوزون، همدم یوخ،
زهلم گئجه‌دن گئدر.

شام یانار، یاغ ارییر،
پیلته‌ده یاغ ارییر.
دردیمی داغا دئسم،
دؤزمه‌یر داغ ارییر.

دوه‌لر قاتار گئدر،
گئجه‌نی یاتار، گئدر.
یار کی بی‌وفا چؽخدی،
یارینی آتار گئدر.

من عاشیق دارا چکر،
زۆلفونو دارا چکر.
شاهین غضبی توتسا،
حؤکم ائلر، دارا چکر.