بایاتی

عزیزی‌یم یارالار،
یار کؤنلونو یار آلار.
فلک ووروب قلبیمه
ساغالمایان یارالار.

اززی‌یم نوبار باغلار،
گۆل تؤکر نوبار باغلار.
گۆنلریم بئله کئچسه،
اۆرگیم قوبار باغلار.

عاشیق داشین آب آغلار،
خالین داشینا باغلار.
بۆلبولون ناله‌سیندن
ایستر داشینا باغلار.

بار وئرر دولو باغلار،
قار یاتار، دولو باغلار.
باغبانی آپاردیلار،
قورودو دولو باغلار.

عاشیق، مرده نه باغلار؟
گۆموش گرده‌نه باغلار.
گئدک دردلی یانینا،
گؤرک درده نه باغلار؟

عزیزیم کۆسو باغلار،
دیندیرمه، کۆسو باغلار.
من یارا نئیله‌دیم کی،
یار مندن کۆسوب آغلار.

دولان، گز بینه، باغلار،
کؤنول قزوینه باغلار.
گؤزوم یاشی گؤل اولوب،
اؤردک، قاز بینه باغلار.

مئی داغلار، مزه داغلار،
یار سیزده گزه، داغلار.
کؤهنلمیش داغ اۆستوندن
چکیلدی تزه داغلار.

عاشیق سۆسه‌نی باغلار،
سۆنبول، سۆسه‌نی باغلار.
باغبانلار سو یئرینه،
یاشیم سو سنی باغلار.

قارشیمیزدا یا داغلار،
یا دۆگونلر، یا داغلار.
عاشیق، یاخشین اؤلوبدو،
قوهوم گۆلر، یاد آغلار.

من عاشیق بو شام باغلار،
شام باغچالار، شام باغلار.
کؤنلوم ائله ویراندی،
آری گلسه، شان باغلار.

باغچاسیز، بارسیز داغلار،
دومانسیز، قارسیز داغلار.
من سیزه آرخالاندیم،
سیز اولدوز کارسیز، داغلار.

یاتیبسان، اویان، داغلار،
آل-یاشیل بویان، داغلار.
بورا زۆلمتخانادی،
نئجه‌دیر او یان، داغلار؟!

بو یولدان گئدن آغلار،
او نازیک بدن آغلار.
من کی یاری سئویرم،
بس یاریم ندن آغلار؟

دوستلوقدان برین داغلار،
چئشمه‌سی سرین داغلار.
یاد اووچویا یار اولدون،
بیر اوتان، ارین، داغلار.

بو یولدان گئدن آغلار،
او نازیک بدن آغلار.
سویولان قفله منیم،
کیرادار ندن آغلار.

دۆشوب اۆزولون، داغلار،
قالخیب، دۆزولون، داغلار.
لب تشنه، جیر اودلو،
سینه‌می ظۆلوم داغلار.

من عاشیق دۆشن آغلار،
آتلانان، دۆشن آغلار.
دۆشدو عاشیق گؤزونه
زۆلفونه دۆشن آغلار.

ندن آغلار بو داغلار،
خزل تؤکر بوداغلار.
ایللر کئچسه ساغالماز
نامرد چکن بو داغلار.

عزیزیم قوشون آغلار،
اوچوروب قوشون آغلار.
وار-یوخو گئدن منم،
کیرکش نؤشون آغلار؟