بایاتی

من عاشیقم یاره‌سن،
بایقو، مئیلی یارا سن.
نه تۆکنمز درد اولدون،
نه ساغالماز یارا سن.

عاشیق آلا گؤزلرین،
جانیم آلا گؤزلرین،
قورخورام دۆشم اؤله‌م،
یادا قالا گؤزلرین.

گلدین کی، یۆز گؤره‌سن،
یۆز گؤستر، یۆز گؤره‌سن.
ائوین یؽخدین عاشیقین،
یۆز گؤره، یۆز گؤره سن.

من عاشیقی درد ایسین،
الیف قدّین درد ایسین.
سن اورادا شاد اول گز،
منی بوردا درد ایسین.

بو داغلار مزه‌لنسین،
گؤی گئیسین، تزه‌لنسین.
نه گؤزوم سنی گؤرسون،
نه دردیم تزه‌لنسین.

قؽزیلدان تاناسی وار،
الینده هاناسی وار.
گؤزله‌ییرم، گلمه‌ییر،
یقین بیر ماهناسی وار.

چؽراغین گیزلی یانسین،
شؤعله وئر، گیزلی یانسین.
باجی باجی اودونا
یاناندا گیزلی یانسین.

عاشیقین یا خاصی وار،
تشنه‌‌یم، یاخا سووار.
فلک، الین دگمه‌میش
گؤر کیمین یاخاسی وار؟

اویدون، یارامی اویدون،
توتدون مارالی سویدون.
غم داغی باسیلمامیش،
دئ، بیر حارامی قویدون؟

من عاشیقم یۆز یال وار،
بیر گدیک وار، یۆز یال وار.
فلک بیلدیگین ائیلر،
سن ایسترسن، یۆز یالوار.

مس گئیینیب، مسی وار،
جانیندا اسمه‌سی وار.
قورخورام وئرمه‌سینلر،
بیر ظالیم ننه‌سی وار.

عزیزی‌یم نه دم وار،
نه صؤحبت وار، نه دم وار.
دگیرمانا گئتمه‌یه،
نه اولاق وار، نه دن وار.

اووچونون هر نسی وار،
بئلینده غمه‌سی وار.
مینیب هیجران آتینا،
اولموشام غمه سۆوار.

آغیر کئچن ایلیم وار،
سؤز توتمایان دیلیم وار.
منی زورلا گتیردین،
منیم بوردا کیمیم وار؟

عزیزیم لئیلی‌سی وار،
مجنونون لئیلی‌سی وار.
یاری ناکام گئدنین
البت گیلئیلی‌سی وار.

بیر قوشام، قانادیم وار،
ائل-اوبادا آدیم وار.
الینی اۆزمه مندن،
قوهومدان چوخ یادیم وار.

خان کرمین باغی وار،
گیرمه باغا، یاغی وار.
دیندیرمه، قان آغلارام،
سینه‌مده یار داغی وار.

بو داغدا مارالیم وار،
اوخ دگمیش یارالیم وار.
نه گئجه‌لر یوخوم وار،
نه گۆندوز قرالیم وار.

گئتمه، اوغلان، یاغی وار،
بئلینده بئلباغی وار.
دول کیشی‌یه گئتمرم،
ساققالیندا آغی وار.

داغ اۆسته گۆزاریم وار،
اۆرکده آزاریم وار.
یار یانینا قویماسا،
گئتمه‌یه مزاریم وار.