بایاتی

گئیینمیشم قارا من،
توش اولموشام سارا من.
نه قدر جفا چکدیم،
یاراشمادیم یارا من.

باغلامیشام شله من.
یۆک آلتدایام هله من.
فلک چکن بو داغا
دؤزممرم بئله من.

گلدیم الده اسا من،
تورپاق باسا-باسا من.
یار اۆز دؤندردی گئتدی،
باتیب قالدیم یاسا من.

باغیندا وار یاسمن،
سۆسن، سۆنبول، یاسمن.
یاردان آیری دۆشه‌لی
غرق اولموشام یاسا من.

عزیزی‌یم یوخسا من،
گۆلمو دریم، یوخ سمن؟
سن سئودین، سن اوساندین،
دلی سنسن، یوخسا من؟

بو یئرین خانی‌یام من،
عشقین سولطانی‌یام من.
یئربیئردن وورورسوز
میر مولتانی‌یام من؟

عزیزی‌یم بیر ده من،
دولدور ایچیم بیر ده من.
عؤمور کئچدی، گۆن کئچدی،
جاوان اولمام بیر ده من.

شفته‌لی‌یم، کالام من،
دیلیم یوخدو، لالام من.
وارلی یئردن قؽز سئودیم،
پول تاپمادیم آلام من.

گؤی اۆزونده پرده من،
دۆشدوم یامان درده من.
سن یاتدین نازبالینجدا،
قالدیم قورو یئرده من.

عزیزی‌یم غولام من،
آغا سنسن، غولام من.
قویماییرلار دانیشام،
دئییرلر کی، غولام من.

میخک اکدیم مرزه من،
باغلامادیم درزه من.
بی‌وفا یار الیندن
کیمه گئدیم عرضه من.

داغلاردا داغینام من،
مجلیسده ساغینام من.
سنده بو نه باخیشدی؟
ائله بیل یاغینام من.

نه دئسن قانیرام من،
سنی یار سانیرام من.
منه اود نه گرکدی،
اودسوز دا یانیرام من.

دریا دولو لیلینن،
بالام اوینار گۆلینن.
عالمه جان باغیشلار،
منی ساخلار دیلینن.

بیر بوینوزلو قوچام من،
یئریم یوخدو، قاچام من.
اۆرگیم سۆفره دئییل،
هر یئته‌نه آچام من.

داش گلیر سئللرینن،
درد گلیر یئللرینن.
یارین دردی اؤلدورمز،
یاندیرار ایللرینن.

سؤزوم یارا دئدیم من،
بارین دردیم یئدیم من.
سرگردان قویدون منی،
دئ بس هارا گئدیم من؟

داغلار داغینجا سننن،
باغلار باغینجا سننن.
اینجیمیشم، کۆسموشم
آغری داغینجا سننن.

یئر-یئمیشین یئدیم من،
اۆرک سؤزوم دئدیم من.
هئچ الله‌ا روادی،
آغساققالا گئدیم من؟

من عاشیق باغی سننن،
باغبانین باغی سننن.
باغا باغبان توتدولار،
آلدیلار باغی سننن.