بایاتی

دریا سندن، سال مندن،
یاشیل سندن، آل مندن.
فلک، ظۆلمون بس ائیله،
گل بو جانی آل مندن!

هارای یئتیم الیندن،
یان وئر اؤتوم الیندن.
قاچیرام، جان قورتاریم،
یئنه توتور الیمدن.

باغا گیرسن بار مندن،
هئیوا مندن، نار مندن.
بیلمه‌دیم نه دئدیم کی،
اینجی‌ییبدی یار مندن.

ترلانیم سار الیندن،
درد چکیر خار الیندن.
جانیم جزانا گلدی
بی‌وفا یار الیندن.

من عاشیق اؤلکه سندن،
قورخورام یولکه‌سندن.
داغلار، قۆزئیلی کؤنلوم،
هئچ گئتمز کؤلگه سندن.

من عاشیق، اللی‌سیندن،
یۆزوندن، اللی‌سیندن.
دردیمین درمانینی
سوروشدوم اللی‌سیندن.

عزیزیم داد الیندن،
فلکین داد الیندن.
جانیم جزانا گلدی،
هر گۆن فریاد الیندن.

بیر قوش گلیر ترتردن،
کتان کؤینک، آغ گردن.
بو قؽز بیزه یار اولماز،
آخیر ائیلر سرگردن.

فلکین اؤز الیندن،
آچمادیم گؤز الیندن.
کیمه ائدیم شیکایت،
بختیمین ازلیندن؟

عزیزی‌یم باغ ایلن،
باغچا ایلن، باغ ایلن.
دئدین آراندا گؤزله،
یولون سالدین داغ ایلن.

هارای ناشی الیندن،
آتماز داشی الیندن.
یاستیق شیکایت ائیلر
گؤزوم یاشی الیندن.

دولان گل بو داغ ایلن،
گۆلو در بوداق ایلن.
سنه یاخشی دئمزلر،
من اؤلسم بو داغ ایلن.

هارای ناشی الیندن،
آتماز داشی الیندن.
اؤزو بیر شوخ ترلاندی،
داد قارداشی الیندن.

دریا دولو لیل ایلن،
بۆلبول اوینار گۆل ایلن.
عالمه جان باغیشلار،
منی ساخلار دیل ایلن.

فلکین آی الیندن،
هئی دۆشمور یای الیندن.
اؤله‌یدیم، قورتارایدیم،
دۆنیادا وای الیندن.

عزیزی‌یم، ناققا من،
چایدا توتدوم ناققا من.
سۆرورم غم آتینی،
چاتاممیرام حاقا من.

عزیزی‌یم غولام من،
آغا سنسن، غولام من.
قویماییرلار دانیشام،
دئییرلر کی، غولام من.

داغدان ائندیم دۆزه من،
تیکان اولدوم گؤزه من.
آییردینیز یاریمدان،
نئیله‌میشدیم سیزه من.

سؤز وئرمرم یادا من،
ایچمه‌میشم بادا من.
بی‌وفانین الیندن
کیمه گئدیم دادا من؟

له‌له منم، له‌له من،
دینمه‌ییرم هله من.
درددن، غمدن، هیجراندان
باغلامیشام شله من.