بایاتی

منیم بو یانمیش کؤنلوم،
دردله قالانمیش کؤنلوم،
بیلدیر ندن خوش کئچدی
بو ایل تالانمیش کؤنلوم.

اوزاق کئچ او دیواندان،
او خاندان، او دیواندان.
گؤزگؤره رۆشوت آلیر،
قورخورام او دیواندان.

داغین مارالی قوربان،
گؤزون قارالی قوربان.
سنین تزه یارانا
کؤهنه یارالی قوربان.

ایچدیک درد آیاغیندان،
دوستام درده یاخیندان.
غم باشیندان بی‌کسین،
توتموش درد آیاغیندان.

من عاشیقم یاخا قان،
یا سولطانام، یا خاقان.
بئله هنکمی اولو؟
ال قان، اۆز قان، یاخا قان.

قاشلارین قاراسیندان،
قوی اؤپوم آراسیندان.
گئج تاپدیم، تئز آیریلدیم
ظالیمین بالاسیندان.

اۆلکر قاندی، قمر قان،
دره، تپه هامار قان.
دردلی سینه‌م اودلانیب،
قان اۆستونه دامار قان.

کؤینگین ساری‌سیندان،
اود توتوب یاری‌سیندان.
سنی مندن ائیلی‌ین
دؤنوبدو تاری‌سیندان.

نه ایستر تاری یاردان،
ال چکسین باری، یاردان.
فلکین قایداسیدی،
آییریر یاری یاردان.

آراز گلیر داشیننان،
سویو قالخیر باشیننان.
ازلی دومدورویدو،
بولاندی گؤز یاشینان.

ایشیم آشمادی باشدان،
گؤزوم دویمادی یاشدان.
فلک منه وئرسه‌یدی،
وئرردی ازل باشدان.

قؽزیلگولسن، بوتاسان،
دوستو عزیز توتاسان.
منه قورو سؤز وئردین،
کؤنول وئردین یادا سن!

من گلیرم آغداشدان،
پاپاغیم دۆشدو باشدان.
بو قؽز منه یار اولماز،
ائیلر قوهوم-قارداشدان.

آشنادانسان، یاددانسان،
آشنا توتدون یاددان سن.
نه آهین جاندان گئدر،
نه چؽخارسان یاددان سن.

من عاشیق او دا گیریان،
من گیریان، او دا گیریان.
دئدیم اودومو سؤندور،
دئمه‌دیم اودا گیر، یان.

داغلارین مارالی جان،
گؤزلرین قارالی جان.
ال دگر- دگمز آغلار،
فلکدن یارالی جان.

دولانیر کئچیر زامان،
فلک وئرمیر بیر آمان.
نه دوستدا اعتیبار وار،
نه یاردا عهدو پئیمان.

ائله‌می من پریشان،
حالیم یوخدو دانیشام.
وارمی منیم کیمی‌سی،
دردی درده قاریشان؟

عزیزیم او بالیقنان،
دریادا او بالیقنان.
بیر وعده‌سیز یئل اسدی،
یاندیق بیز اوبالیقنان.

بیر قوش گلیر دربنددن،
یۆکون توتوبدو قنددن.
سینه‌مده بیر دفتر وار،
یازیلیبدی هر درددن.