بایاتی

گۆلو دردیم بوداقنان،
ساللانیب گل بو داغنان.
سنه یاخشی دئمزلر،
من اؤلرسم بو داغنان.

کئچیردیم مهلنیزدن،
سس گلدی دهننیزدن.
گۆنده بیر خبر گلیر.
داغیلمیش مهلنیزدن.

بو داغلارین بارینان،
گؤرمه‌دیم نوبارینان.
مرد اولان دا دؤنرمی
وئردیگی ایلقارینان؟

گئدرم ائلینیزدن،
دۆشمرم دیلینیزدن.
بیر یاشیلباش سونایام،
اوچارام گؤلونوزدن.

آشیق دئیر علیدن،
سؤزون باشلار بلیدن.
آغلی کم جانانا باخ،
کۆسوبدو من دلیدن.

آیریلدیم اسدیمدن،
جانیمدان، جسه‌دیمدن.
بو گۆن ده دردیم آرتدی
گۆنده‌لیک رستیمدن.

قوشوم قاچدی تۆلکدن،
قولوم سؽندی بیلکدن.
منیمکی بئله گلدی،
چارخی دؤنموش فلکدن.

فلکین داد الیندن،
اولمورام شاد الیندن.
باغلار خزه‌له دؤندو،
تؤکولدو باد الیندن.

سو تۆکندی سنکدن،
سنک سؽندی بیلکدن.
بیر یامان گۆنه دۆشدوم،
قورتارمادیم کلکدن.

اللی سندن، یۆز مندن،
خیال کئچر یۆز مندن.
قانلی یاشیم آخماقدان،
اینجی‌ییبدی یۆز مندن.

من عاشیقم ازلدن،
یار یارین وئرمز الدن.
دوستوم وار، دۆشمنیم وار،
سالما منی نظردن.

الیفین بئیی مندن،
آلدیلار هئیی مندن.
اۆرییمتک ناله چک،
چالماغا نئیی مندن.

باغی گزدیم ازلدن،
دسته توتدوم خزلدن.
بیلسه‌یدیم وفان بودو،
دوست اولمازدیم ازلدن.

اووچونون گشتی مندن،
اوخ دگدی، کئچدی مندن.
مردلره کؤرپو اولدوم،
نامردلر کئچدی مندن.

داغا چؽخدیم ازلدن،
عؤمور گئتدی تئز الدن.
یوخسوللوق آیری سالدی،
منی سنتک گؤزلدن.

تبیلین سینجی مندن،
دۆرر مندن، اینجی مندن.
دئدیم وفالی دوست اول،
دئمه‌دیم اینجی مندن.

عزیزی‌یم مندیلدن.
باشا اؤرتموش مندیلدن.
دئین دئدی قورتاردی،
قورتارمادیم من دیلدن.

ایل آلیر آیی مندن،
گۆنلری، سایی مندن.
یار اوخ آتیر قلبیمه،
گیزله‌دیر یایی مندن.

آی گلدی کئچدی ایلدن،
سولار بولاندی لیلدن.
او قدر یالواردیم کی،
آخیر دۆشدوم من دیلدن.

داغلارین قاری مندن،
باغلارین باری مندن.
اینصافسیز یارا بیر باخ،
اسیرگر ناری مندن.