بایاتی

باغدا بار اولان جانیم،
هئیوا، نار اولان جانیم.
بی‌وفا یاردان اؤترو
سولوب، سارالان جانیم.

یاریمی چایدا گؤردوم،
الینده بایدا گؤردوم.
نه اؤپدوم، نه دیشله‌دیم،
بوندان نه فایدا گؤردوم.

ائله‌می شکر جانیم،
هر دردی چکر جانیم.
نه حاقیم وار، نه مۆزدوم،
بگلره نؤکر جانیم.

قارشیدا ساری گؤردوم،
ترلانی، ساری گؤردوم.
ظابیط، یارین مئیل ائیلر
رقیبه ساری گؤردوم.

من عاشیق خؽردا یاریم،
گؤرونمز بوردا یاریم.
خویراد سؤزیله منی
چولادی درده یاریم.

ائله‌می حالا دۆشدوم،
یامان بیر حالا دۆشدوم.
من کی قالدان اوزاخدیم،
ندن بس قالا دۆشدوم؟

بو داغدا قالان اولدوم،
دیللرده تالان اولدوم.
هر بیر دردینی چکدیم،
آخیر من یالان اولدوم.

عزیزیم خسته دۆشدوم،
یؽخیلدیم، خسته دۆشدوم.
فلکین دوستاغینا
قوللاری بسته دۆشدوم.

چؤللرده بوستان اولدوم،
دیللرده داستان اولدوم.
طالعییم بد گتیردی،
آشنادان، دوستدان اولدوم.

اززیم یادولان گؤزوم،
یا دؤن، یا دولان گؤزوم.
آغلاماسین نئیله‌سین،
یاردان یاد اولان گؤزوم.

عزیزیم اۆزدن اولدوم،
صؤحبتدن، سؤزدن اولدوم.
بیر بی‌وفا یولوندا
آغلادیم، گؤزدن اولدوم.

باغیندا واردی اۆزوم،
دردیم نیمچه‌یه دۆزوم.
درد-غم منی سارالدیب،
یئنه گۆلور بد اۆزوم.

باغبان کؤنلوم، بار کؤنلوم،
هئیوا کؤنلوم، نار کؤنلوم.
گۆلمکله آرام یوخدو،
آغلاماغا وار کؤنلوم.

سۆرو ائندی قایادان،
یۆکون توتدو تایادان.
یار دالینجا دولاشدیم،
دۆشدوم آبیر-هایادان.

دومانلی داغلار، کؤنلوم،
نیسکیللی باغلار، کؤنلوم.
نه آچیلماز، نه گۆلمز،
همیشه آغلار کؤنلوم.

من اؤلدوم آغلاماقدان،
آرخا سو باغلاماقدان.
باغدا خزل قالمادی
یاراما باغلاماقدان.

آ منیم توراج کؤنلوم،
قؽرغی گلدی، قاچ کؤنلوم.
چکیل داغلار باشینا،
غم کیتابین آچ، کؤنلوم.

یارالاندیم یانیمدان،
قوشلار دویماز قانیمدان.
فلک بیر درده سالدی،
ال چکدیم اؤز جانیمدان.

دمیر کؤنلوم، داش کؤنلوم!
هیجران گلدی، قاش کؤنلوم!
چکیل ویران کۆنجونه،
غم دفتری آش، کؤنلوم!

هئچ درمه‌دیم باریمدان،
الیم اۆزدوم یاریمدان.
داغلار دومانا دؤندو
منیم آهو-زاریمدان.