بایاتی

له‌له‌یم من له‌له‌ندیم،
بئشیگه من بلندیم.
اکدیم، بیشدیم، سوووردوم،
آرخاما شله‌لندیم.

گؤی اۆزو کیلیم-کیلیم،
دگدی بوداغا نئیلیم؟
یاریم مندن کۆسوبدو،
گلمیر اوتاغا نئیلیم؟

من عاشیق یازا دردیم،
کاتیب یوخ یازا دردیم.
فاغیر بۆلبوللر کیمی،
قالیبدی یازا دردیم.

عزیزیم یادا نئیلیم؟
یاد اوغلو یادا نئیلیم؟
گؤرور آهو-ناله‌می،
گلمیر ایمدادا، نئیلیم؟

بی‌وفا یارا نئیلیم؟
گئیینیب خارا نئیلیم؟
ککلیک، توراج اوولاغی
قالیبدی سارا، نئیلیم؟

چووغون منیم، باد منیم،
عؤمروم اۆزور یاد منیم.
جفا چکدیم، یار سئودیم،
یار اؤزگه‌نین، آد منیم.

قره‌نفیل اسدی، نئیلیم؟
صبریمی کسدی، نئیلیم؟
اؤزو دوست، قلبی قارا،
من بئله دوستو نئیلیم؟

بارماغیم بئشدی منیم،
گۆنلریم کئچدی منیم.
جفا چکدیم، یورد سالدیم،
آخیریم هئچدی منیم.

باغا سو کئچدی، نئیلیم؟
گۆللری بیچدی، نئیلیم؟
عالمه جان پایلاندی،
بیزه غم دۆشدو، نئیلیم؟

هانی درمانیم منیم،
دردیم، درمانیم منیم؟
جللادین الینده اوخ،
اؤلوم فرمانیم منیم.

آشیق اووانی نئیلیم،
دردی سووانی نئیلیم؟
منه اؤزون گرکسن،
قورو دووانی نئیلیم؟

یاندی بو جانیم منیم،
تؤکولدو قانیم منیم.
زامانا آلدی الدن
دینیم، ایمانیم منیم.

تامبور ساز اولدو، نئیلیم؟
اؤردک قاز اولدو، نئیلیم؟
من بیر آزارا دۆشدوم،
سبب قؽز اولدو، نئیلیم؟

یاد اۆزدو جانیم منیم،
آخیتدی قانیم منیم.
عؤمرو باشا وورماغا،
یوخدو گۆمانیم منیم.

درد-غمیم چوخدو، نئیلیم؟
اۆرکده اوخدو، نئیلیم؟
دۆشدوگوم بو بلانین
چاره‌سی یوخدو، نئیلیم؟

درد منیم، دؤزوم منیم،
کئچمه‌ییر سؤزوم منیم.
اؤلسه‌یدیم، قورتاراردی
حسرتدن گؤزوم منیم.

ائله‌می گۆنو نئیلیم؟
گۆن وئرمیر گۆنو نئیلیم؟
ار دؤیور، بالدیز دؤیور،
من بئله گۆنو نئیلیم؟!

اۆممان دردیم وار منیم،
کؤنلوم اولور خار منیم.
مسکنیم داغلار باشی،
همدمیمدی قار منیم.

باغا سو دۆشدو، نئیلیم؟
تنک سو ایچدی، نئیلیم؟
الله پای پایلایاندا
منه بو دۆشدو، نئیلیم؟

باشیما کۆللر منیم،
گؤزومه میللر منیم.
اگدی شوخ قامتیمی
بو اوزون ایللر منیم.