بایاتی

گؤیدن اوچان قوش منم،
آتلانمیشام، دۆشمنم.
هر قوشون بیر یوردو وار،
وطنسیزم، دۆشمنم.

عرضیم وار یارا، گئدیم،
اۆرگیم پارا گئدیم.
سن مندن اۆز دؤندردین،
ایندی من هارا گئدیم؟

من عاشیقم، دۆشمنم،
آتلانمیشام، دۆشمنم.
گؤر نئجه یاد اولموشام،
هئچ یادلارا دۆشمنم.

یاریم یوخ، یارا گئدیم،
دردیمه چارا گئدیم.
نه یار قالدی، نه ایلقار،
حارام وار، هارا گئدیم؟

اززی‌یم درده کرم،
یولداشدی درده کرم.
قوشموشام غم کوتانین،
اؤزومه درد اکرم.

تارچی‌یام، سیمه گئدیم،
سؤزون دئ، هیمه گئدیم.
بو درد کی یاردان گلیب،
درمانا کیمه گئدیم؟!

قلیانی من چکرم،
سنینله تن چکرم.
دردین قوی دردیم اۆسته،
اونو دا من چکرم.

دردیمه چاره گئدیم،
من باختیقارا گئدیم.
سن منی اودا سالدین،
حارام وار، هارا گئدیم؟

داغ باشیندا قار ایدیم،
گۆن دگمه‌میش اریدیم.
مندن اۆز دؤندرن یار،
آخی یارین من ایدیم.

بۆلبول اؤتنه دردیم،
یئتدی بو طعنه دردیم.
قوی چؽخیم یول اۆستونه،
دئییم یئته‌نه دردیم.

فلکی دیندیره‌یدیم،
بیلمزین بیلدیره‌یدیم.
منه یازی یازاندا
قلمین سؽندیرایدیم.

عزیزیم قارا دردیم،
مئو اکدیم، قورا دردیم.
بیرجه همدم تاپیلماز،
آپاررام گورا دردیم.

قلیانی بایاق چکدیم،
دولدوروب بایاق چکدیم.
یاری بی‌وفا گؤردوم،
یولوندان آیاق چکدیم.

عزیزیم دئدی دردیم،
یار گلدی، دئدی دردیم.
گل دۆش من دۆشن درده،
اوندا بیل ندی دردیم.

جان دئدیم، جانا گلدیم،
دینه، ایمانا گلدیم.
یاریم غۆربتده قالدی،
من یانا-یانا گلدیم.

داغدان اۆنوم کئچیرتدیم،
قارا گۆنوم کئچیرتدیم.
آغلادیم، باجارمادیم،
گۆلدوم، گۆنوم کئچیرتدیم.

داغلاری گزدیم گلدیم،
داشلارین دۆزدوم گلدیم.
یاریم وفاسیز چؽخدی،
اۆمیدیم اۆزدوم گلدیم.

عاشیقم نه سین، دئییم،
نه الیف، نه سین دئییم.
گۆنوم غارته کئچدی،
حالیمین نسین دئییم؟

بو داغی آشدیم گلدیم،
سئل کیمی داشدیم گلدیم.
بیر جۆت اؤپوشدن اؤترو
یارنان ساواشدیم گلدیم.

قؽشدی، یازدی، نئینی‌ییم،
الده سازدی، نئینی‌ییم.
قامتین قیامتدی،
آغلین آزدی نئینی‌ییم.