بایاتی

من نئینیم، اؤزوم نئینیم؟
بو درده دؤزوم نئینیم؟
آه چکسم، عالم یانار،
چکمه‌سم، اؤزوم نئینیم؟

یارین کؤنلون آلایدیم،
دردیم یادا سالایدیم.
قیسمتیم بئله ایمیش،
گرک یالقیز قالایدیم.

قاپیدا قالما، یئتیم،
صاداقا آلما، یئتیم.
یازیغام، آه اودونو
جانیما سالما، یئتیم.

قایادان آتیلایدیم،
قول اولوب ساتیلایدیم.
بی‌وفا یار الیندن
اؤله‌یدیم، قورتولایدیم.

سن یئتیم، من ده یئتیم،
آستا گئت، من ده یئتیم.
سن مورادینا یئتدین،
گۆن اولسون من ده یئتیم.

آشیقلا تن اولایدیم،
سازلا اؤتن اولایدیم.
اغیار جانین آلماغا
عزرائیل من اولایدیم.

قاپی‌نین یانی یئتیم،
سؤزومون جانی یئتیم.
یئییب دویاندان سونرا
دئیرلر، هانی یئتیم؟

قارا قازان آسایدیم،
آلتدا چؽرپی باسایدیم.
سؤزوندن دؤنن قؽزی
ساچلاریندان آسایدیم.

عزیزیم گۆنه یاندیم،
گۆن چؽخدی، گۆنه یاندیم.
عالم بیر دفعه یانسا،
من دؤنه-دؤنه یاندیم.

گزیب آرخا دولاندیم،
ساپ تک چارخا دولاندیم.
ظالیم فلک الیندن
قورخا-قورخا دولاندیم.

یاتمیش ایدیم، اویاندیم،
درده، غمه بویاندیم.
داش اولسایدیم، اریردیم،
تورپاق ایدیم دایاندیم.

داغ اۆسته هارا باخدیم،
یار گلدی، یارا باخدیم.
سنین اۆزون گۆلمه‌دی،
منیم ده قارا باختیم.

عزیزیم آغلامازدیم،
گۆلردیم، آغلامازدیم.
بیلسه‌یدیم، وفان بودور،
سنه بئل باغلامازدیم.

سارایدان سابون آسدیم،
سن منیم عزیز دوستوم.
هر نه دئدین، سن دئدین،
من نه دئدیم، سن کۆسدون؟

آخ-وای دئدیم، قاریدیم،
آخ-وایدان نه یاریدیم.
تزه یاغان قار ایدیم،
گۆن دگمه‌میش اریدیم.

گۆنومو قارا یازیم،
یوخومدو چارا، یازیم.
اۆرک دفتریم دولوب،
دردیم وار، هارا یازیم؟

عزیزیم یارا یازیم،
تۆکندی چارا یازیم.
گۆنومون هر ورقی
دولوبدو، هارا یازیم؟

ناله چکدیم، آه توتدوم،
گاه ایلندیم، گاه توتدوم.
ائلده بیر دردلی گؤردوم،
اؤز دردیمی اونوتدوم.

ایلخیدان آت پایلاییم،
اولسا اون قات پایلاییم.
اوروجدان نه گؤردوم کی،
فیتره-زکات پایلاییم؟

من بیر بلالی قوشدوم،
داغدان قایایا اوچدوم.
ائنیب گۆله قونوردوم،
نه پیس تیکه‌نه دۆشدوم.