بایاتی

باغچا بار وئرنده گل!
هئیوا، نار وئرنده گل!
بیر گلدین خسته گؤردون،
بیر ده جان وئرنده گل!

عزیزی‌یم نه قیام،
زۆلفون اۆزده نه قیام.
سن جامالدان نه قؽیدین،
من جانیمدان نه قؽیام؟

عزیزیم مرنده گل،
خاص گۆلون درنده گل.
بیر گلدین خسته گؤردون،
بیر ده جان وئرنده گل.

من بیر عرب قؽزی‌یام،
غریب سراب قؽزی‌یام.
دیندیرمه، قان آغلارام،
خانه‌خراب قؽزی‌یام.

الینده گۆلدسته گل،
دردی قوی درد اۆسته، گل.
جان وئریردیم، گلمه‌دین،
ایندی قبریم اۆسته گل.

شفته‌لی‌یم، ساری‌یام،
قؽزیلگولون خاری‌یام.
من فلکه نئیله‌دیم،
قویمادی بیر یاری‌یام؟

عزیزینم اویان گۆل،
او یان بۆلبول، او یان گۆل.
سندن الیم اۆزمرم،
منی ماغمین قویان گۆل.

یاخشی آواز، گور کلام،
اوخو درسین پۆرکلام.
نه سویوغا تابیم وار،
نه پولوم وار، کۆرک آلام.

باغچاسیندا ساری گۆل،
یاری قؤنچه، یاری گۆل.
نیه مندن کۆسوبسن؟
باری دانیش، باری گۆل!

باغچانیزدا گۆل اوللام،
اوخورام، بۆلبول اوللام.
بی‌وفا یار الیندن
اودا یانیب کۆل اوللام.

یئری گئت آستا، کؤنول،
دولان گل دوستا، کؤنول.
گؤزوم یاری آختاریر،
کان اولوب خسته، کؤنول.

قارا آتی باغلارام،
ساغ قولوندان داغلارام.
یار منی قویدو گئتدی،
گئجه-گۆندوز آغلارام.

قؽزیل اۆزوک بیر بادام،
بو اؤلکه‌ده من یادام.
قفسده بۆلبول کیمی
گاه میوسام، گاه شادام.

شیروانا یول باغلارام،
درد الیندن آغلارام.
یاردان کاغیذ آلماسام،
من ده کۆسو ساخلارام.

اولدوز دئییلم، آیام،
اولدوزلاردان من سایام.
بیر یامان قاینانام وار،
الیندن جازانایام.

اززینم اوولامارام،
اوو گؤرسم، اوولامارام.
من اؤزوم یارالی‌یام،
یارالی اوولامارام.

یارالی‌یام، یاتمارام،
حرفه غلط قاتمارام.
منیم دردیم اؤزگه‌دی،
هئچ دردلره قاتمارام.

من عاشیقم، باختی کم،
باغبانیم یوخ باغ تیکم.
من فلکه نئیله‌دیم،
فلک منه باخدی کم؟!

نئیلوفرم، آچمارام،
عطریم بیجا ساچمارام.
یار اونسوز دا دردلیدی،
دردیم اونا آچمارام.

دولانیب داغ گزیرم،
بۆلبولم، باغ گزیرم.
یۆز یئریمدن یارام وار،
دئییرلر ساغ گزیرم.