بایاتی

باغدا اۆزوم آغاجی،
اۆزوم، گؤزوم آغاجی.
باغا بالتالی گلدی،
کسدی بیزیم آغاجی.

من عاشیق اسدی فلک،
صبریمی کسدی فلک.
بوردا بیر چادیر قوردوم،
کلفین کسدی فلک.

آشیق نئیلر یاد آشی،
چاخچاخ دؤیر ها داشی.
یۆکون هیجران یۆکودو،
کیرکئشسن؛ ها داشی.

ائله‌می اسدی فلک،
جانیمین قصدی فلک.
هانسی سویا تور آتدیم،
دوغرادی، کسدی فلک.

اوددان فلک، یان فلک،
قلبین اولوب قان، فلک.
کیمی‌یه مین درد وئردین،
کیمی‌یه درمان، فلک.

هر سؤزون قاندی اۆرک،
سنی دوست ساندی اۆرک.
دیننده دیلیم یاندی،
دینمه‌دیم، یاندی اۆرک.

نه ظالیمسان سن فلک؟
عؤمرو بؤلدون تن، فلک.
جان قورتاریم الیندن،
هارا گئدیم من، فلک؟

یار گئیینیب تامام آل،
تامام یاشیل، تامام آل.
بو یاریمچیق جانیمی
رحمین یوخسا تامام آل.

گئتمه‌دین، قالدین، فلک،
خوش گۆنوم آلدین، فلک.
یانار اودون ایچینه
بیر منی سالدین، فلک.

قارا دریا، قارا سال،
آغ اۆستونه قارا سال.
بیر درددی، چکر عاشیق،
کیمسه بیلمز غرض حال.

آمان فلک، اوخ فلک!
ووردون منه اوخ فلک!
یوخسول، غریب ائدینجه،
ائت بیر یوللوق یوخ، فلک!

آغ بوخاقدا قارا خال،
خوش یاراشیر یارا خال.
منیم سؽنیق کؤنلومه
ائیله‌مه‌دی چارا خال.

داغلاردان اسن کۆلک،
صبریمی کسن کۆلک.
یار زۆلفونو داغیتدین،
ظالیمسان، نسن کۆلک؟

داغلاردان اسن بو یئل،
عؤمرومو کسن بو یئل.
یاری مندن آییردی،
قاننیمدی اسن بو یئل!

سانا بیر آنا گرک،
اودونا یانا گرک.
بو دردلری چکمه‌یه
بیر خلوت خانا گرک.

سیرّ سؤزوم آچدی گؤزل،
سؤزوندن قاچدی گؤزل.
دیل آچدیم، کؤنول وئردیم،
اۆرگین داشدی، گؤزل؟

سؤز دئمه‌یه سؤز گرک،
باخماق اۆچون گؤز گرک.
کؤنول، سن کی دؤزنسن،
بو درده ده دؤز، گؤرک.

گل ائیله‌مه قان، گؤزل!
قوربان سنه جان، گؤزل!
من حسرتدن یانیرام،
سن ده آلیش یان، گؤزل!

عزیزیم قاندی اۆرک،
یار سؤزون داندی اۆرک.
شیرین شربت ایچیرتدین،
ندن بس یاندی اۆرک؟!

خوروز بان وئرنده گل،
سینه‌م قان وئرنده گل.
ساغلیغیمدا گلمه‌دین،
باری جان وئرنده گل!