بایاتی

عزیزیم یارا قانلی،
یار قانلی، یارا قانلی.
اؤلدورسن من یازیغی،
اولارسان یارا قانلی.

ائلدن مرد آزالیمی؟
قویما مرده ظالیمی.
لوغمان طبیب گلمه‌سه،
جاندان درد آزالیمی؟

ائله‌دینمی وای قانلی،
وای قادالی، وای قانلی.
یار، منی سن اؤلدورسن،
آدین اولار وایقانلی.

باغچالاردا گۆل وارمی؟
گۆل اۆسته بۆلبول وارمی؟
بیچیندن الیم اۆزدوم،
یؽغماغا سۆنبول وارمی؟

مارالین گؤزو قانلی،
یولو قان، ایزی قانلی.
بالام گئدیب گلمه‌سه،
توتارام سیزی قانلی.

قؽش گلسه گۆن اولارمی؟
قؽشدا چیسکین اولارمی؟
آغلا، گؤزلریم، آغلا،
بوندان پیس گۆن اولارمی؟

قارشیدا اودا دامی،
او جنّت، او دا دامی.
ائله کی یار یاندیریر،
یاندیرماز اود آدامی.

داغ باشین چن آلیرمی؟
آلسا کؤلگه سالیرمی؟
یۆز مظلومون قیصاصی
بیر ظالیمدا قالیرمی؟

عزیزیم، قؽزا دامی،
اود یانا، قؽزا دامی.
هر درددن چوخ سارالدار
بی‌وفا قؽز آدامی.

بۆرویوب سار اوبانی،
گزرم خار اوبانی.
بدؤی آت مینن جانیم
مینیبدی آرابانی.

عزیزیم دوه دامی،
نر دامی، دوه دامی.
نه چؤلده چوبان اولدوم،
نه ائوده ائو آدامی.

مینمیسن آل یورغانی،
سۆر، یئری، آل یورغانی.
گلن اجل تریدی،
اۆستومدن آل یورغانی.

دولاشدیم هر دیوانی،
آختاردیم سر دیوانی.
بوردا بیر ائیوان تیکدیم،
اوچورتدو چار دیوانی.

ائله‌می گۆل آنباری،
گۆل اکدیم گۆل آنباری.
ظالیم فلک قویمادی
دویونجا گۆلم باری.

داغلار توتوم دومانی،
یوخدو بیرجه اومانی.
ائلدن علی اۆزولوب،
کیمه گئتسین گۆمانی؟

داغلارین شاختا قاری،
دؤرد یانی اولدو باری.
کاسیبا قؽز وئرمزلر،
کسیلسین قایدالاری.

گئیمیسن آلاجانی،
منصورون آلا جانی.
عاشیق او گۆندن قورخار،
عزرائیل آلا جانی.

داغلارین تزه قاری،
یاغیبدی تزه قاری.
آروادی پیس اولانین
ساققالی تئز آغاری.

اززینم، داشدی جانی،
ککلیگین داشدی جانی.
دردیمی پۆنهان چکدیم،
دئدیلر: داشدی جانی.

داغلارین یاتان قاری،
دوماندا باتان قاری.
کیشینی تئز قوجالدار
آخشامدان یاتان قاری.