بایاتی

بو داغدا قایا سالدی،
گۆن اونا سایه سالدی.
یاری خلوتده گؤردوم،
سؤز دئدیم، هایا سالدی.

عزیزیم مهریباندی،
قاش گؤزه مهریباندی.
مندن یاد اولان گؤزون
گؤر کیمه مهریباندی.

دوست دوستون آتین آلدی،
داوانی ساتین آلدی.
ائویم او گۆن یؽخیلدی،
آغام بیر خاتین آلدی.

آلتی دریا، اۆز قاندی،
ایری قاندی، دۆز قاندی.
ائو یؽخماق بیر قاندیسا،
کؤنول یؽخماق یۆز قاندی.

من عاشیق آغلاغاندی،
گؤزلریم آغلاغاندی.
سن دردلی، من یارالی،
گؤرک کیم آغلاغاندی.

بیر گمیم سئلده یاندی،
درد چکدی، سئل ده یاندی.
گؤردو گؤزومون یاشین،
آخاردا سئل دایاندی.

سمندین اویناغاندی،
چک باشین، اویناغاندی.
رحمین یوخ، اینصافین یوخ،
اللرین اوی، نه قاندی!

اۆزویون قاشی یاندی،
اۆستونون داشی یاندی.
پارام یوخ نیشان وئریم،
قلبیمین باشی یاندی.

عزیزیم، دابدا یاندی،
گۆن باتدی، داغ دایاندی.
گئتدیم اودوم سؤندورم،
اودومدان داغ دا یاندی.

آی کئچدی، ایلیم یاندی،
کؤینکده میلیم یاندی.
درددن اۆرک توتوشدو،
آغیزدا دیلیم یاندی.

عزیزیم تاغدا یاندی،
شاماما تاغدا یاندی.
دالیمی داغا وئردیم،
آلیشدی داغ دا یاندی.

باغیمدا گۆلوم یاندی،
شئه دۆشدو، گۆلوم یاندی.
باغبان، باغبان دئمکدن
آغزیمدا دیلیم یاندی.

یاشیم اۆزه دایاندی،
آخیب دیزه دایاندی.
بایاق دردیم بئش ایدی،
ایندی یۆزه دایاندی.

شالیم قارا بویاندی،
اوجو یئره دایاندی.
منیم آهو-زاریمدان،
چرخ-فلک اویاندی.

یان وئردی سال دایاندی،
بارخانام سالدی یاندی.
دردیمدن خبر بیلدی،
اود توتدو، سال دا یاندی.

بولود گلدی قالاندی،
قار یاغدی، قار قالاندی.
قارغالار لاچین اولدو،
لاچینلار قارغالاندی.

بو یئرده سو دایاندی،
اود گلدی، سودا یاندی.
دردیمی سویا دئدیم،
آلیشدی سو دا یاندی.

آتلی پیادالاندی،
دردی ضیادالاندی.
گلدیم دردیم آزالا،
درد تا دا سادالاندی.

بو ائل سنین تایاندی،
حالیم سنه عیاندی.
آه چکدیم، دومان قالخدی،
گؤیده قوشلار دایاندی.

ائلیم گۆنوم تالاندی،
اۆستوندن اود قالاندی.
یاد الیندن ائل کؤچدو،
بیر داغا دالدالاندی.