بایاتی

گمیم دریادا قالدی،
ایشیم فریادا قالدی.
سن منیم باختیما باخ،
یار سئودیم، یادا قالدی.

بو یئرده بینه قالدی،
ائل کؤچدو، بینه قالدی.
غمدن بیر ائو تیکدیردیم،
بیلمه‌دیم کیمه قالدی.

نامازیم قضا قالدی،
قؽلمادیم، قضا قالدی.
نه قول مورازین آچدی،
نه گۆنو یازا قالدی.

عزیزیم قؤنچه قالدی،
قؽزیلگول قؤنچه قالدی.
هر درده دؤزن جانیم
اریدی، اینجه قالدی.

باغچادا لالا قالدی،
الده پیالا قالدی.
آنانی آپاردیلار،
یورددا بیر بالا قالدی.

ائله‌می داغلی قالدی،
اۆرگیم داغلی قالدی.
تالاندی ائو-ائشیییم،
داروازام باغلی قالدی.

بو داغلار هارا قالدی،
گزمه‌دیم، سارا قالدی.
یار سئودیم، آپاردیلار،
کؤنلومه یارا قالدی.

ائله‌می، بفام قالدی،
پنجه‌ده بفام قالدی.
جفا چکدیم، یار سئودیم،
اؤزومه جفام قالدی.

یاغیش یاغدی، نم قالدی،
قلیان کئچدی، دم قالدی.
باغچادا بار بول ایدی،
دولو ووردو، کم قالدی.

داغ باشینی قار آلدی،
قاردا بو نه قارالدی؟
یار مندن اۆز دؤندردی،
عؤمروم، گۆنوم قارالدی.

دریادا گمیم قالدی،
بیچمه‌دیم، زمیم قالدی.
چوخ چکدیم یار جفاسین،
منه ده غمیم قالدی.

داغ باشینی سار آلدی،
کؤنلوم آهو-زار آلدی.
دۆنن بیر، بوگون ایکی،
رنگین ندن سارالدی؟

داغلار باشین داد آلدی،
دؤرد بیر یانین یاد آلدی.
گئدیردیم یئتم یارا،
اۆستومو جلّاد آلدی.

عزیزیم قارا سالدی،
خاللارین قارا سالدی.
یار قالخدی غم داغینا،
اؤزونو قارا سالدی.

داغ باشین آیاز آلدی،
قار گلدی، آیاز آلدی.
سایدیم، گۆنوم ایل کئچدی،
سایمادیم، آی آزالدی.

هارای، منی بو سالدی،
اوزون عؤمروم قؽسالدی.
قان آغلایان گؤزلریم
ویران باغا سو سالدی.

داغ باشین دومان آلدی،
چن گئتدی، دومان آلدی.
سونالار کؤچ ائیله‌دی،
ائل، اوبا سارا قالدی.

چالمانی باشا چالدی،
گؤز اۆستن قاشا چالدی.
من نامرده نئیله‌دیم،
عؤمرومو داشا چالدی؟!

یئل اسدی اثر قالدی،
سریمده اثر قالدی.
یار سئودیم، یاد آپاردی،
منه درد-سر قالدی.

ککلیک قوشا داغیلدی،
چاشا-چاشا داغیلدی.
آنانی اؤلدوردولر،
بالا داشا داغیلدی.