بایاتی

گۆن گئتدی، آی دولاندی،
بولود دا دالدالاندی.
هر درده دؤزن جانیم،
چک، ایندی اؤز بلاندی.

قویون، قوزو قاریشدی،
جاوان جانیم آلیشدی.
سن اوزاقدا، من بوردا،
بو نئجه ایسماریشدی.

قارشیدا آی ایراندی،
آی رومدو، آی ایراندی.
یامانا باخماز عاشیق،
یاخشیدان آییراندی.

گلدی گئجه طارازی،
زۆلفون گئجه طارازی.
بو همدمسیز عاشیقدن
اولماز گئجه ده راضی.

الیمده گۆلوستاندی،
آچ، اوخو «گۆلوستان»دؽ.
بۆلبولون گؤز یاشیندان
باغچادا گۆل ایستاندی.

قارشیدا عرب آلی،
عاریفسن آرا بالی.
دردیمی چکمز، عاشیق،
گلسه یۆز آرابالی.

گئییندی یار، آریندی،
غم باغریم یارار ایندی.
جانانسیز یئرده، عاشیق،
جان نه‌یه یارار ایندی؟

مجمگیده گاوالی،
یئدیم، اولدوم هاوالی.
قونشودا بیر قؽز سئودیم،
او دا چؽخدی داوالی.

عزیزیم یاد آپاردی،
داد چکدی، داد آپاردی.
یارا بیر گۆل ساخلادیم،
اونو دا باد آپاردی.

من عاشیقم، گؤی آلی،
باغبان ساخلار گؤی آلی.
فلکین قایداسیدی،
یئتیشمه‌میش گؤی آلی.

منی داوات آپاردی،
قلم، داوات آپاردی.
یارام ساغالیر اولسا،
حکیم داوا تاپاردی.

بیر قوش اوچور بالالی،
آری شاندان بال آلی.
گؤره‌سن هئچ اولارمی
من تک باشی بلالی؟

سئل گلدی، داش آخیتدی،
سویو چاش-باش آخیتدی.
ائل کؤچدو، اوبا قالدی،
داش-دیوار یاش آخیتدی.

عاشیق بیلر حالالی،
حاقدان دیلر هاوالی.
گؤزلین بی‌وفاسی
آخیر جاندان حال آلی.

داغدان سو گلدی داشدی،
داشیب، بره‌دن آشدی.
من یارا نئیله‌دیم کی،
یار منی قویدو قاشدی؟!

یوخدان وار اومان آلی،
بلکه وار گۆمان آلی.
بختیکم اووا چؽخسا،
داغلاری دومان آلی.

داغلارین نه قارالی،
نه صبری، نه قارالی.
جانیما بیر اود ووردون،
نه سؤنر، نه قارالی.

عزیزیم سرین جامی،
دولدور وئر سرین جامی.
فلک ووردو، داغیتدی
من بیچن سرانجامی.

اووچو وورار مارالی،
مارال دۆشر یارالی.
فلک بیر اود ووروبدو،
نه سؤنو، نه قارالی.

درد منی آلمادیمی؟
دؤشه‌یه سالمادیمی؟
چوخ گؤزلمم وار ایدی،
گؤزومده قالمادیمی؟