بایاتی

عزیزیم گۆل آچانی،
یاندیرار گۆل آچانی.
بی‌وفا یار یولوندا
دؤندردیم کۆله جانی.

دولان گل بو داغلاری،
یاشیل چمن، باغلاری.
آلدی منیم الیمدن
فلک گؤزل چاغلاری.

قار توتوب شاه داغینی،
دون ووروب نؤوراغینی.
چکیلیب تۆلک ترلان،
سار آلیب اوولاغینی.

گئجه‌نین بو داغلاری،
گۆل آچمیش بوداقلاری.
اؤلسم سینه‌مدن گئتمز
یاریمین بو داغلاری.

مارالین دیزی قاننی،
گؤزو قان، اۆزو قاننی.
یار اؤزو قان ائیله‌ییب،
توتوبدو بیزی قاننی.

شیروانین بو چاغلاری،
اود تؤکر اوجاقلاری.
هامی یارا قوووشدو،
من گزدیم بوجاقلاری.

آغاجین ازل باری،
یئمه‌یه ازل باری.
سن کی وفاسیز ایدین،
دئیه‌یدین ازل، باری.

گنجه‌نین آغاشلاری،
بار گتیرر باشلاری.
من بیر گؤزل سئومیشم،
وئرمه‌ییر قارداشلاری.

توللان باغدا حاصاری،
یا آغ گئیین، یا ساری.
ایگیدی آلچاق ائیلر
زن اهلی‌نین یاساری.

دگیرمانین ها داشی،
چاخچاخ دؤیر ها داشی.
چۆن ده سن حامبال اولدون،
غم یۆکونو ها داشی.

داغ آیری، دومان آیری،
قاش آیری، کامان آیری.
سالدی بیزی آخیردا
رحمسیز زامان آیری.

من عاشیق، غمه قارشی،
خاللارین غمه قارشی.
نه بلالی قول اولدوم،
دورموشام غمه قارشی.

باغبان دۆزر حاصاری،
باغا قویماز یاساری.
غمدن بیر ائو تیکمیشم،
هیجرانداندی حاصاری.

عزیزیم میله قارشی،
کیرپی‌یین میله قارشی.
دردله کئچن گۆنلریم
دوروب بیر ایله قارشی.

شیروانین آغ آلماسی،
یئمه‌لی آغ آلماسی.
قیامت گۆنه قالدی
یارامین ساغالماسی.

من عاشیق گئجه‌دن وای،
وئر مۆرغه گئجه دن، وای.
گئجه سندن گیلئیلی،
من یارسیز گئجه‌دن، وای.

قولاغیندا تاناسی،
اۆستون اؤرتوب شاناسی.
قونشو قؽزین سئویرم،
وئرمیر ظالیم آناسی.

آتلانان هئی، دۆشن هئی!
گنجین اۆسته‌دی شن هئی!
آغلار، بس آغلامازمی؟
بئله درده دۆشن هئی!

کؤینگین او یاخاسی،
درد گلیب، اویا خاصی
قوی منیم الیم اولسون،
دۆشمنین او یاخاسی.

آراشقینی دسته قوی،
ائندیریب گؤز اۆسته قوی.
گتیر بۆتون دردلری،
دردیمین دۆز اۆسته قوی.