بایاتی

عزیزینم پیر داغی،
پیر اوجاغی، پیر داغی.
کؤنلوم سئودا جۆنونو،
چکمه اونا پیر داغی.

چایلار داشدی، چاغلادی،
درد اۆستدن درد باغلادی.
گئتدیم دردسیز یانینا،
او مندن چوخ آغلادی.

بو داغلار هۆرو داغی،
دومان، گل بۆرو داغی.
اؤلو داغی چکیلر،
ساغالماز دیری داغی.

اۆرکده قان قالمادی،
اۆزولدو، جان قالمادی.
ائله بیر بلا گلدی،
نه آد، نه سان قالمادی.

من عاشیق قمقالاغی،
توتوبدو قمقالاغی.
داغلاردان اوجا کؤنلوم،
توتوبدو غم قالاغی.

کیسه تیکدیم، دولمادی،
سویا سالدیم، سولمادی.
ائلچی گلدی قاپی‌یا،
اؤزوم دئین اولمادی.

گؤروندو بالدیر آغی،
لبیندی، بال دوراغی.
گل اؤلدورمه عاشیقی،
سنه بابالدیر آغی.

داغ باشین قار آلیبدی،
یاغیبدی، قار آلیبدی.
باجادان بیر داش دۆشوب،
اوجاغیم قارالیبدی.

پنجره آی ایشیغی،
اولدوم ائللر آشیغی.
گئدیبدیر، گلر تاپار،
مهلمین یاراشیغی.

عزیزیم یار داغیدی،
گؤرونن یار داغیدی.
سینه‌مین غم کاساسین،
داغیتسا یار داغیدی.

دۆیمه‌سی وار، دوندادی،
دۆزوبدو بوینوندادی.
یئتیمین اۆزو گۆلمز،
اللری قوینوندادی.

آشیق قاراباغلیدی،
خالین قارا باغلیدی،
نه گئدن وار، نه گلن،
یوللار قارا باغلیدی.

گؤزومون قاراسیدی،
کؤنلومون پاراسیدی.
منی آوارا قویان
بیر ظالیم بالاسیدی.

تپه اوچدو، داغ قالدی،
مارال قاچدی، ساغ قالدی.
یار یادا قیسمت اولدو،
منه آغلاماق قالدی.

آرخالیغین ساریدی،
سینه‌ن داغین قاریدی.
من یازیغین چکدیگی
یارین آهو-زاریدی.

خان گئتدی، چکمه قالدی،
لبه مئی چکمه، قالدی.
یارین یاد اولدو، عاشیق،
سنه جانچکمه قالدی.

من عاشیق بادا قالدی،
ایشیم ایمدادا قالدی.
جفاسی مننن اولدو،
صفاسی یادا قالدی.

قؽشدان یازا نه قالدی،
عرضیم یازانا قالدی.
قلمده نه گۆناه وار،
مۆروت یازانا قالدی.

درد گئتدی، قادا قالدی،
گۆنوم فریادا قالدی.
ظۆلم الیندن ائل کؤچدو،
یورد-یووام یادا قالدی.

ائلدن گلن نه قالدی،
نه غوغادی، نه قالدی؟
غمزه یادین، ناز یادین،
داها منه نه قالدی؟