بایاتی

ائله‌می گؤزل کیمی،
باخیرسان گؤزل کیمی.
درددن سارالدی، دۆشدو
اۆرگیم خزل کیمی.

عاشیق یادینا منی،
خالین یادینا منی.
کیمیم وار یار یانیندا،
سالا یادینا منی.

آغلارام آغلار کیمی،
دردیم وار داغلار کیمی.
خزل اوللام، تؤکوللم
ویرانه باغلار کیمی.

یاز گۆنو قارا منی،
چکدیرمه دارا منی.
ظالیم-ایمانسیز آنام
ساتدی کافدارا منی.

من عاشیق یاسه‌مه‌نی،
خاللارین یاسه‌مه‌نی.
آپارمادی شادلیغا،
آپاردی یاسه منی.

داغدا توتوب قار منی،
گؤزله چالار سار منی.
گؤر نه گۆنه قالمیشام،
ساتیر یادا یار منی.

عاشیقم یاسه‌مه‌نی،
گئی، ساللان یاسه‌مه‌نی.
اؤزو تویلارا واریر،
گؤندریر یاسه منی.

اینجیدیر اغیار منی،
خنجر آلیب یار منی.
گؤر نه زاماندی زامان
اوولاییر بو سار منی.

قؽزیلگول دسته منی،
ائیله‌دین خسته منی.
آوارا بۆلبول کیمی
قویدون قفسده منی.

بو دردلر اویار منی،
آل قانا بویار منی.
اؤگئیدن آنا اولماز،
سرگردان قویار منی.

یاد گؤردو، دئدی منی،
درد اویدو، یئدی منی.
وفاسیزا سیرّ وئردیم،
عالمه دئدی منی.

داغدا قار آلار منی،
گؤزله، خار آلار منی.
داغلاردان آشیب گلسم،
اووچو یارالار منی.

کؤنول آلداتدی منی،
غۆربته آتدی منی.
آنا، یازدیغین سؤزلر
خئیلی آغلاتدی منی.

آپاردی چایلار منی،
اولدوزلار، آیلار منی.
یۆکوم درد-غم یۆکودو –
یوردو بو تایلار منی.

عزیزی‌یم دم منی،
قوی آپارسین دم منی.
عرضیم یارا یئتیرین،
اؤلدوردو بو غم منی.

آپاردی تاتار منی،
قول ائدیب ساتار منی.
وئرمه دۆشمن الینه،
پیس دئییب آتار منی.

قار کیمی اویدون منی،
نار کیمی سویدون منی.
نه کؤلگنده بسله‌دین،
نه گۆنه قویدون منی.

اودا یاخیر آه منی،
گاه یاریمی، گاه منی.
تاخسیریم، گۆناهیم یوخ،
باغیشلامیر شاه منی.

یاد گلدی سۆزدو منی،
ساپلارا دۆزدو منی.
آغ گۆنه حسرت قویدو،
قارا گۆن اۆزدو منی.

آی آلما سویدو منی،
یئمه‌میش دویدو منی.
ندیر منیم تاقسیریم؟
یاندیریب اویدو منی.