بایاتی

قیبله‌دن کۆلک اسدی،
عشقین صبریمی کسدی.
یاریما خبر آپار،
آغلاماق دخی بسدی.

گۆن دوغالی تار گئتدی،
ترلان گئتدی، سار گئتدی.
زامان ائله دولاندی،
دوستلوق، اعتیبار گئتدی.

خوش گۆنوم آیدا گئتدی،
تور قوردوم، چایدا گئتدی.
من گۆنلری ساییردیم،
تئز گلدی، آی دا گئتدی.

بو عشق نه‌لر ائله‌دی،
عؤمروم حدر ائله‌دی.
آغلاماقدان اۆزومده،
گؤز یاشیم یئر ائله‌دی.

بوردان بیر مایا گئتدی،
ساللاندی، چایا گئتدی.
یولوندا جفا چکدیم،
امییم زایا گئتدی.

دریا، سندن کیم کئچدی؟
کیم غرق اولدو، کیم کئچدی؟
یار گؤنلونو آلینجا،
اۆرگیمه سیم کئچدی.

بۆلبوللر قوشا گئتدی،
های سالدی چاشا گئتدی.
تور قوردوم ترلان توتوم،
زحمتیم بوشا گئتدی

دریا، سندن کیم کئچدی؟
کیم غرق اولدو، کیم کئچدی؟
باشیم جلّاد الینده،
اۆرگیمه کیم کئچدی.

گؤیده اولدوز اۆچ کئچدی،
جاوان عؤمروم پوچ کئچدی.
فلک بیر درد گؤندردی،
اۆرگیمدن توش کئچدی.

داغلارا قوش گلرمی؟
گلسه ده بوش گلرمی؟
من سئویم، یاد آپارسین،
تانری‌یا خوش گلرمی؟

گؤیده اولدوز خوش کئچدی،
جاوان عؤمروم بوش کئچدی.
فلک، بیر سؤیله گؤروم،
هانسی گۆنوم خوش کئچدی؟!

وئرمه خازارا منی،
چکر بازارا منی.
یادا کنیز وئرینجه
ساللا مزارا منی.

اززی‌یم گۆنو کئچدی،
آی کئچدی، گۆنو کئچدی.
قوجالدین، قوچاق گلین،
یئرینه گۆنو کئچدی.

عزیزیم من چکه‌نی،
جزانلا من چکه‌نی.
هئچ کافر، هئچ مۆسلمان،
چکمه‌سین من چکه‌نی.

عزیزیم نه طارازی،
نه داش وار، نه طارازی.
کیشینی تئز قوجالدار
آروادین ناطارازی.

آتدیلار بادا منی،
بۆرویوب قادا منی.
آلمادی قوهوم-قارداش،
وئردیلر یادا منی.

قوی چالسین نئی دردیمی،
هه، پئیدرپئی دردیمی
تاپایدیم درد چکه‌نی،
تؤکه‌یدیم هئی دردیمی.

عزیزیم بودا منی،
خنجر آل، بودا منی.
گؤر نه گۆنه قالمیشام،
بگنمیر بو دا منی.

من عاشیق هئی دردیمی،
گؤرور گۆنئی دردیمی.
ائله بیل دیلماجیمدی،
چالیر بو نئی، دردیمی.

عزیزیم آلما منی،
سئودایا سالما منی.
سننن ائو تیکن اولماز،
یازیغام، آلما منی.