بایاتی

عزیزی‌یم نه درددی،
نه درماندی، نه درددی.
آیریلارسان یاریندان،
بیلرسن بو نه درددی.

سو گلدی داشا دگدی،
کیرپیکلر قاشا دگدی.
بی‌وفا یار یولوندا
گۆل عؤمروم باشا دگدی.

گؤزوم او گلینده‌دی،
کمری بئلینده‌دی.
من آغلارام، او گۆلر،
اینصاف اؤز الینده‌دی.

آمان، منی درد اگدی،
نامرد اگدی، درد اگدی.
سینه‌مین شۆشه‌سینه
چارخ هرلندی، پر دگدی.

گشت-صیراط ائیله‌دی،
سؤزوم برات ائیله‌دی.
سئودیم بی‌وفا یاری،
گؤنلوم قارات ائیله‌دی.

آرخین سویون سئل اگدی،
اۆزده تئلین یئل اگدی.
غۆربتدن قازانجیم وار،
ساچ آغارتدی، بئل اگدی.

غم ندی، غمچی ندی؟
سمندین قمچیله‌دی.
جانی درددن قورودوم،
غم اۆسته غم چیله‌دی.

بولودلار قارا گلدی،
یول آچدی، هارا گلدی؟
فلک بیر درد گؤندردی،
او درد ده یارا گلدی.

شیرواندی، خان یئریدی،
اوردوباد جان یئریدی.
ساغیمدان گۆلله دگدی،
سولومدان قان یئریدی.

آی گئتدی، ایله گلدی،
بۆلبوللر دیله گلدی.
اغیار بو پیس گۆنومه
هئی گۆله-گۆله گلدی.

بو یئر ائللر یئریدی،
شانا تئللر یئریدی.
قایساقلانمیش یاراما
تزه میللر یئریدی.

گۆن کئچدی، ایله گلدی،
گؤز یاشیم گیله گلدی.
تبریزین ناله‌سیندن
داغ-داش دا دیله گلدی.

ائله‌می یاغ اریدی،
پیلته‌ده یاغ اریدی.
دردیمی داغا دئدیم،
آهیمدان داغ اریدی.

گۆن کئچدی، ایله گلدی،
گؤز یاشیم گیله گلدی.
چرخ-دؤران الیندن
سۆموک ده دیله گلدی.

اللیدی، یۆز اینجیدی،
قابلارا دۆز، اینجیدی.
کؤنول هر درده دؤزدو،
بد اۆزدن اۆز اینجیدی.

دیلیمه کلمه گلدی،
اوخودوم، کلمه گلدی.
اینصافسیز قوجالیغا
ها دئدیم، گلمه، گلدی.

اجل گئتدی، تر گلدی،
تردن درد-سر گلدی،
من غریبلیک هاییندا،
بیر ده بدخبر گلدی.

آی دوغدو گیرده‌لندی،
دوغدوقجا گیرده‌لندی.
اودووا یاندی جانیم،
کۆلووه گیرد الندی.

داغ باشینا سیس گلدی،
اوجاق یاندی، هیس گلدی.
منیم بو قارا باختیم
ازل باشدان پیس گلدی.

داغلارا قان چیلندی،
سمندین غمچیلندی.
ایچدیم دردیم آزالا،
داها دا غم چیلندی.