بایاتی

داغلاردا، مئشه‌لرده،
شام یانار شیشه‌لرده.
هر آی سن یار قوینوندا،
من قالدیم مئشه‌لرده.

من عاشیق آه-اوف ایله،
درد گئتمز آه-اوف ایله.
مولّایا درد آچانین
دردی دؤنور قیفیله.

سویون اۆزونده پرده،
دۆشموشم من بو درده.
والله، دؤزه بیلمیرم
دوستوم اولمایان یئرده.

قویون گئدیر ایزییله،
دؽرناغی‌نین توزویله.
قارداش منی توللادی
یاد قؽزی‌نین سؤزویله.

گۆن کئچیر پرده-پرده،
من دؤزورم بو درده.
ائو-ائشیییم داغیلیب،
قالمیشام قورو یئرده.

من عاشیق گۆله-گۆله،
گۆل اکدیم گۆله-گۆله.
دۆشمن ائویمی یؽخدی
اۆزومه گۆله-گۆله.

بوستان تزه، باغ تزه،
مارال تزه، داغ تزه.
قایساقلی یارام اۆسته
یار چکیبدی داغ تزه.

بۆلبول قونوبدو گۆله،
جالاق اولوب گۆل-گۆله.
خار گلدی باغچامیزا،
خزان گتیردی گۆله.

گئدن بوز آتلی، گئتمه!
یولون اوزاقدی، گئتمه!
منیم گؤزومون یاشی
سنه دوزاخدی، گئتمه!

بۆلبول اوچار باغ اۆسته،
شامامالار تاغ اۆسته.
نه قایدادی فلکده –
داغی چکر داغ اۆسته؟!

یاخشی دوست، دؤز گۆنومه،
گل دئ بیر سؤز گۆنومه.
فلک الیمه دۆشسه،
سالارام اؤز گۆنومه.

عزیزینم گۆل اۆسته،
بۆلبولونم گۆل اۆسته.
اوچمارام، جان وئررم
بو تیکانلی گۆل اۆسته.

سحر گئتدیم دۆکه‌نه،
داراشدیم گۆل اکنه.
منیم قورخوم اوندادی،
یارسیز عؤمروم تۆکه‌نه.

آغاجدا واردی پۆسته،
هر یانی ساردی پۆسته.
یادا بویون ایینجه
الله‌دان اؤلوم ایسته.

سهنگی آلدیم، ننه،
سویا یوللاندیم، ننه.
بو ویرانه چؤللوکده
من سوسوز قالدیم، ننه.

عزیزی‌یم بئله یاز،
قلم گؤتور بئله یاز.
ناکام کؤنلوم شاد اولماز،
یۆز ایل گلسه بئله یاز.

ائله‌می بایقوش سنه،
قونمازمی بایقوش سنه.
نئجه بدبخت یورد اولدون،
هئی گلر بایقوش سنه.

عزیزیم قارانی یاز،
آغ اۆستن قارانی یاز.
اززل دفتر باشینا
من باختی قارانی یاز.

یول وئردین گمی‌سینه،
سو وئردین زمی‌سینه.
هئچ بنده‌نین بالاسی
قالماسین عمی‌سینه.

داغی یاز، آرانی یاز،
توفانی، بورانی یاز.
گؤزومه درددن دۆشن
آغی یاز، قارانی یاز.