بایاتی

عزیزیم اۆزوم قارا،
باغیمدا اۆزوم قارا.
یار یانینا گئدیرم،
الیم بوش، اۆزوم قارا.

بولود ائندی داغلارا،
خزان گلدی باغلارا.
فلکین گردیشیندن
عؤمور-گۆن کئچیر قارا.

عزیزیم زۆلفو قارا،
آغ اۆزده زۆلفو قارا.
هر کیم منه ظۆلم ائتسه،
تاپشیررام زۆلفوقارا.

بو یول گئدیر اوتارا،
اوتار هارا، اوت هارا؟
یوخسول دا بیر آت آلدی،
یئر تاپمادی اوتارا.

داغلار دۆشوبدو دارا،
بو درده یوخدو چارا.
کاسیب بیر یابی تاپدی،
اوتچون قالدی آوارا.

من عاشیق گۆلو خارا،
یایلیغین گۆلو خارا.
دئدیلر بۆلبول اؤلوب،
وئردیلر گۆلو خارا.

من عاشیق باغی یارا،
باغبانین باغی یارا.
بیز چؽخدیق باغبانلیقدان،
تاپشیردیق باغی یارا.

من اولموشام بیچارا،
بیچاره‌یه نه چارا؟
قاپیم حاقدان باغلانیب،
کیمه گئدیم آچارا؟

من عاشیقم دیل یارا،
بایقو مئیلی دیل یارا.
آغلاماقدان گؤزلریم،
سؽزلاماقدان دیل یارا.

تامبورون اۆزی تاختا،
ایکیمیز بیر اوتاختا.
من نه چاره ائیله‌ییم
الله وئرمه‌ین باختا.

زیاتام، باشدان یارا،
آرتیبدی باشدان یارا.
منی حسرت یاراتدی
یارادان باشدان یارا.

مارال توش گلدی اوخا،
یاییندی، چؽخدی یوخا.
ماحالدا کند بیرجه‌دی،
ایچینده اللی کوخا.

ووردو منه یار یارا،
دوغرا باغریم یار، آرا.
فلکده نه قایدادی،
حسرت قالیر یار یارا؟!

نارینجا باخ، نارینجا،
ساخلارام سارالینجا.
اؤله‌یدیم، قورتارایدیم
بو گۆنلره قالینجا.

سؤزون دئمه آشکارا،
درده تاپیلماز چارا.
دیندیرمه، قان آغلارام،
اۆرگیمده وار یارا.

نفس وار جان دورونجا،
اۆرکده قان دورونجا.
تنگه-جزانا گلدیم
قانمازی قاندیرینجا.

ائله‌می قار قامیشا،
قار یاغیب قارقامیشا.
یۆز مین بنده نئیله‌سین
بیر فلک قارغامیشا.

بو گئجه توی اولاجاق،
قؽز-گلین اوینایاجاق،
ایلان وورموش آناسی
قؽزینی قویمایاجاق.

گمی گئدیب، یان گئدیب،
ایچینده بیر جان گئدیب.
من نئجه آغلاماییم –
الدن خانیمان گئدیب؟!

من جاوانام اوتانجاق،
باشیمدا واردی سانجاق.
نه قؽز اولدوم، نه گلین،
اودلارا یاندیم آنجاق.