بایاتی

من عاشیق بو داماخدا،
غم منی بوداماقدا.
هئچ بیر کافیر گؤرمه‌سین
لئیلی‌سین بو دم آهدا.

عاشیق ناچار آغلاما،
گۆندور کئچر، آغلاما.
فلک باغلی قاپینی
بیر گۆن آچار، آغلاما.

یاخشی یول یاخشی قؽزا،
بوردان کئچن نرگیزه.
بو بختور قؽزلاری
کؤچورمک دۆشمور بیزه.

دئدیم: دیلبر، آغلاما،
قارا اؤرپک باغلاما
اؤز دردیم منه بسدی،
من یازیغی داغلاما.

دولوب تامام باغ آلما،
باغبان بسلر آغ آلما.
یارام، نه سؽزیلدارسان؟
ساغالمیرسان، ساغالما!

پیس کئچنده زامانا،
باخماز یاخش-یامانا.
آجلیق ایمیش یوخسولون
قدّی دؤنر کامانا.

من عاشیق عرضوروما،
یول گئدر عرضوروما.
دوه‌سی اؤلموش عربم،
دؤزورم هر ظولوما.

عزیزیم داغیستانا،
یول گئدر داغیستانا،
نئجه‌سن بیر آه چکم،
آهیمدان داغ ایستانا؟!

ساماوار یانا-یانا،
بوغلانیر یانا-یانا.
دانیشیریق کاغیذلا،
دیل قالیر یانا-یانا.

یول دۆشدو داغیستانا،
سن ده گل داغیستانا.
آغلاسانا، گؤزلریم،
غمیندن داغ ایستانا.

عزیزی‌یم یار قانا،
یار اوخویا، یار یانا.
لاچین چالمیش سونایام،
قؽسیلمیشام یارغانا.

عزیزی آی آیدینا،
تر سالار آی آیدینا.
ظۆلمتده قالان باشیم،
چؽخمادین آی آیدینا.

عزیزیم مارالیانا،
یول گئدیر مارالیانا.
قورخورام آه-نالمدن
داغلاردا مارال یانا.

داغلارین دالداسینا،
گۆن گئدر دالداسینا.
بیر دالا دالدالاندیم،
قورخورام دال دا سؽنا.

من عاشیقم سالیانا،
دارا زۆلفون، سال یانا.
نئجه‌سن بیر آه چکیم،
کۆر قورویا، سال یانا.

بیز گلدیک تایاسینا،
آتلیلار تایاسینا.
ائشیدن تنهایی‌نین،
یؽخیلسین تا یاسینا.

پروانه ندن یانا،
اود توتا بدن یانا.
یاخشی دوست یامان گۆنده
چکیلیر ندن یانا؟

چؽخدیم هۆندور دیوارا،
باخدیم بیر گؤزل یارا.
من باخدیم، او باخمادی،
قلبیمه ووردو یارا.

آی زامانا، زامانا،
اوخو قویدون کامانا.
ائششکلر آرپا یئییر،
آت حسرتدی سامانا.

ائله‌می باغری قارا،
بیر قوش وار باغریقارا.
لاله کیمی گۆل اولماز،
اونون دا باغری قارا.