بایاتی

قوربان سنه گؤزوم، یار،
واردی سنه سؤزوم، یار.
بوردان بیر قونشو کئچدی،
سرکرده‌سی بیزیم یار.

من عاشیق داشا دۆشر،
ککلیگیم داشا دۆشر.
قارداشین مۆشکول ایشی
یئنه قارداشا دۆشر.

عزیزیم قارا باغلار،
آل اۆستن قارا باغلار.
یارامی یار باغلاسین،
یار یاخشی یارا باغلار.

گؤز یاشیم داشا دۆشر،
آخدیقجا داشا دۆشر.
باجی‌نین آغیر گۆنده
یۆکو قارداشا دۆشر.

بو یوردون تاجی باغلار،
مئیوه‌سی آجی باغلار.
آغریسا قارداش باشی،
یئنه ده باجی باغلار.

دؤران، ایشین کلکدیر!
گرک گؤهر، گرک دۆرر،
قارداشا جان یاندیرین،
یامان گۆنه گرکدیر.

داغ باشیندا قار اولار،
باغچالاردا بار اولار
قاینانا پیس اولاندا
درده قالان یار اولار.

خنجر اۆسته قاش گلیر،
قوشون باشاباش گلیر.
قوشونا قوربان اولوم،
ایچینده قارداش گلیر.

آیا بئله باخارلار،
گۆنه بئله باخارلار.
آرخاسی اولمایانین
ائوین بئله یؽخارلار.

قارداشیم چیندن گلیر،
چؤلدن بیچیندن گلیر.
الینده بیر دسته گۆل
بگلر ایچیندن گلیر.

مارال اوخدان قاچیبدیر،
قاننان چوخدان قاچیبدیر.
ائللره خبر اولسون،
یاغی چوخدان قاچیبدیر.

آرخام، هایانیم قارداش،
هاردا دایانیم، قارداش؟
باش قویوم دیزین اۆسته،
قوی چؽخسین جانیم قارداش.

قارداش منیم گۆلومدور،
گۆلومدور، بۆلبولومدور.
باجی قارداشا قوربان،
قارداش اؤلسه، ظۆلومدور.

قارداش، قارداش، خان قارداش،
قؽیغاجی باخان قارداش.
بؤیو-بؤیو، باشا چات،
آپاراق نیشان، قارداش.

گتیر سازینی، قارداش،
پوزما یازینی، قارداش.
بؤیو، اول قوچاق ایگید،
چکیم نازینی، قارداش.

گۆلوم قارداش، جان قارداش،
من سنه قوربان قارداش.
جانیم سنه صاداقا،
سن ایتیرمه قان، قارداش.

ائل کؤچ ائیلر بو داغا،
قوشلار قونماز بوداغا.
ائله کی من دؤزورم،
هئچ کس دؤزمز بو داغا.

عزیزی‌یم دریادا،
گمیم قالدی دریادا.
آغلادیم، گؤز یاشیمدان
دولدو، داشدی دریا دا.

یئتیشدیک قالاجیغا،
اویما گل قالاجیغا.
مجروه دئر: سونا کؤچه،
یوردوندا قالا جؽغا.

دۆشوبدو قان آرادا،
خسته یوخ، قان آرادا
اولدوم قفس بۆلبولو،
قالدیم من قنارادا.