بایاتی

یاغیبدیر قار، آ تئللر،
آغاردی قارا تئللر.
نامرد گلیب ائللرین
عؤمرونو قارات ائیلر.

اززیم ایرانا دوغرو،
گئدر ایرانا دوغرو.
باشیم کس، قانیم آخسین
قدیر بیله‌نه دوغرو.

عزیزیم اؤتمک اولماز،
کؤهله‌نی اؤتمک اولماز.
ائلین آتدیغی داشی
یئردن ترپتمک اولماز.

بیرجه بئله مومودوم،
سو قوینوندا قومودوم.
نه کیمیم وار، نه کیمسم،
سانا گلیر اومودوم.

بوستانچی قووون دردی،
کال دردی، قووون دردی.
یؽغیلین، قوهوم-قارداش،
اۆستومدن قووون دردی.

قایا تک بوزلار گؤردوم،
گؤیده اولدوزلار گؤردوم.
آناسینا اوخشایان
قوچاق، مرد قؽزلار گؤردوم.

گؤیده اولدوز ناشیدی،
کیم بالامین یاشیدی؟
اوغلانا ائللر قوربان،
اوغلان اۆرک باشیدی.

باختیم قارادیر باشدان،
قلبیم قاییمدیر داشدان.
بیر آلا گؤز یار اۆچون
کئچمک اولماز قارداشدان.

منیم یاریم ناشیدی،
ناشیلارین باشیدی.
آتداناندا بگ اوغلو،
دۆشنده یۆزباشیدی.

شفته‌لی‌یم، آغام من،
هر مئیوه‌دن چاغام من.
قورخما، وفالی دوستوم،
اؤلمه‌میشم، ساغام من.

بولاغین باشی دایی،
دیبی‌نین داشی دایی.
دوروم باشینا دؤنوم،
آنام قارداشی دایی.

داغلارین قاشی سنسن،
دیبی‌نین داشی سنسن.
ائلده نئچه ایگید وار،
هامی‌نین باشی سنسن.

قارداش منیم ملی‌ییم،
جیبیمده اینه‌لیگیم.
کؤچنده کؤچوم-قونوم،
دۆشنده کؤلگه‌لیگیم.

ائله‌می آرخا گلسین،
سو آخسین، آرخا گلسین.
من تکم، دۆشمنیم چوخ،
کۆمکه آرخا گلسین.

قؽزین باختی آغ اولسون،
قوهوملاری ساغ اولسون.
قؽزین گئتدیگی یوللار
یانسین، چیلچیراق اولسون.

درد الیندن داغ یانار،
باغچا یانار، باغ یانار.
قارداش گیرسه قاپیمدان،
ائویمده چؽراق یانار.

عزیزی‌یم دادی وار،
یارین شیرین دادی وار.
یۆز ایگید سؽراسیندا
قارداشیمین آدی وار.

گمیم گلر یان گئدر،
ایچینده بیر جان گئدر.
قارداش گلن یوللارا
باجیلار قوربان گئدر.

داغ دؤشونده دامیم وار،
باغیمدا بادامیم وار.
گل قاپیدان گیر، قارداش،
دئسینلر آدامیم وار.

سنه تئللی دئییرلر،
علی بئللی دئییرلر.
بورا بیر ایگید گلیب،
بیزیم ائللی دئییرلر.