بایاتی

عزیزی‌یم یاخشی سین،
اووچو، یئره یاخشی سین.
مرد ایگیدده قایدادی،
سئور یارین یاخشی‌سین.

بوخاری قوروم ساخلار،
اود یانار، قوروم ساخلار.
عاشیق دئر: ار لیباسین
گئیمه‌سین قورومساخلار.

قونوب اۆسته سار، دیوار،
اؤرتوب اۆستون قار، دیوار.
سنله منیم دوستلوغوم
اؤلنجن واردی، وار.

سیسیانی قاپان ساخلار،
جاندا درد قاپان ساخلار.
عاشیق آر چکمک اۆچون
کؤنولده قاپان ساخلار.

حالالار، آی حالالار،
قارتال داغدا بالالار.
قورخاق اؤلر، محو اولار،
ایگید آلار قالالار.

داغدان گلر سئل آخار،
یار گۆل درر، گۆل تاخار.
ایگید اۆز-اۆزه گلسه،
بیر-بیرینه دیک باخار.

گمی گلر، یان گئدر،
یان ایلنر، یان گئدر.
دوست دوستدان کئچن اولسا،
اۆز چئویریب، یان گئدر.

داغلارا دومان گلر،
آی گلر، آمان گلر.
گئتمه‌سین او یاخشی کی،
یئرینه یامان گلر.

الینده فانار گئدر،
باخدیقجا یانار گئدر.
بیر دوست بی‌وفا چؽخسا،
دوستوندان کنار گئدر.

سویوموز کۆردن گلر،
ایچمه‌یه کۆردن گلر.
ایگید دؤنسه اوبایا،
خبرسیز، بیردن گلر.

دورنالار قاتار گئدر،
بولوددا باتار گئدر.
وفالی‌یا جان قوربان،
بی‌وفا آتار گئدر.

سۆرولر مه‌لر گلر،
داغلاری ائنر گلر.
نامرده توش اولانین
باشینا نه‌لر گلر؟!

ایلدیریم چاخار گئدر،
سو گلیب آخار گئدر.
دوستلار پیس گۆنده گلر،
بی‌وفا باخار گئدر.

عاشیقم بیر گۆن دۆشر،
آتلانان بیر گۆن دۆشر.
دۆشمنه دۆشن بازار،
بیزه ده بیر گۆن دۆشر.

عزیزیم دالدا گزر،
بۆلبوللر دالدا گزر.
مردلر قاباغی گؤزلر،
نامردلر دالدا گزر.

ایگیدین بیر آتیدیر،
بیر ده تمیز ذاتیدیر.
کوروغلودا قوچاقلیق
اونون احتیاطیدیر.

عزیزی‌یم باش ایر،
بارلی بوداق باش ایر.
دۆنیا نامرد دۆنیادی،
مرد نامرده باش ایر.

من عاشیقم درد اولدو،
گؤزلریمه درد اولدو.
ائشیتدیم رقیب اؤلوب،
او دا منه درد اولدو.

گمی یۆکون یان چکر،
زلی سورار، قان چکر.
یاخشی گۆنده دوست-آشنا،
یامان گۆنده جان چکر.

شیروانین یاستی یولو،
سو گلدی باسدی یولو.
گئدیردیم یار گؤرمه‌یه،
نامردلر کسدی یولو.