بایاتی

چکیلیب درد حاصاری،
گئدیرم درده ساری.
نامرد دیزیمی قؽرسا،
سۆروننم مرده ساری.

سن منیم آغا دوستوم،
ساللان گل باغا، دوستوم.
اۆزونون حؤرمتیندن
بیزه نور یاغا، دوستوم.

من عاشیق نه وفاسی،
نه عهدی، نه وفاسی.
وفالی‌یا جان قوربان،
نامردین نه وفاسی.

داغا قار یاغا، دوستوم،
ساللان گل باغا، دوستوم.
سن دومان اول، من چیسکین،
چکیلک داغا، دوستوم.

عزیزی‌یم دوست آشی،
دوست خؤره‌یی، دوست آشی.
دۆشمنین گۆلله‌سیندن
یامان اولار دوست داشی.

من عاشیق، اوتاغیندان،
قاشلارین او تاغیندان.
مردین توولاسی یئیدیر.
نامردین اوتاغیندان.

مرد آنادان مرد اوغول،
یادا آغا، مرده قول.
قورخاق تؤهمت گتیرر،
باش اوجالدار مرد اوغول.

گئتمرم اوتاغیننان،
گۆل سؽنار بوتاغیننان.
ایگید آتین سییردر
دۆشمنین یاتاغیننان.

عزیزی‌یم غمده گۆل،
غمده دانیش، غمده گۆل.
آغ گۆنده گۆلن کؤنول،
مرد ایگیدسن غمده گۆل.

تیفلیسین اۆستو بوستان،
گؤزل یئردیر گۆرجوستان.
نامردین قایداسیدی،
آییرار دوستو دوستدان.

دۆنیانین گشتی مندن،
اوخ تکی کئچدی مندن.
یاخشی‌یا کؤرپو اولدوم،
یامان دا کئچدی مندن.

باغیندا وار آلچالار،
یاشیل چالار، آل چالار.
آغلاما، دلی کؤنلوم،
دۆشمن گؤرر، ال چالار.

دۆنیانین گردیشیندن،
تنگ اولدوم هر ایشیندن.
مردین باشی قال چکیر
نامردین شر ایشیندن.

اووچولار اووون اوولار،
گؤزله‌یر اووون اوولار.
مورقوزدان قالخان ترلان،
یالوازدا اووون اوولار.

اۆزویونده قاشام من،
جومردلیکده باشام من
یاخشی گۆنده گز، دولان،
پیس گۆنده یولداشام من.

گۆل-گۆله قات، آ باغلار،
درد-غمی آت، آ باغلار.
یاخشی آت مینن ایگید
اۆمیدین آتا باغلار.

بو داغین قاشی سنسن،
دیبی‌نین داشی سنسن.
دۆنیاجا دوستوم اولسا،
هامی‌نین باشی سنسن.

آشیق اوداسین باغلار،
شئه دۆشوب، چیسکین باغلار.
نامرد مئهمان گؤرنده
چکر اوداسین باغلار.

سن منی قول ائیله‌دین،
دردیمی بول ائیله‌دین.
داغیتدین ائل-اوبانی،
دۆشمنه یول ائیله‌دین.

سولار گلر، گؤل دولار،
شاختا وورار، گۆل سولار.
مرد ایگیدین بالاسی
اؤزو کیمی مرد اولار.