بایاتی

عاشیقم، بن ده دادا،
لبیننن بنده دادا.
یئتیشسن، اؤزون یئتیش،
یئتیشمز بنده دادا.

عاشیقم، سالماسا دا،
یول گئدر سالماسا دا،
پۆنهان آغلا، گؤزلریم،
عالمه سالما سادا.

داغلاری ائن پیادا،
یولو کس تن پیادا.
گئدیرم حاقا چاتام،
او آتلی، من پیادا.

سئیوانین قور اوجادا،
کور مؤحتاج قورو جادا.
گۆلگزین گؤز یاشیندان
قالمادی قورو جادا.

وئریبدی آغی یادا،
یار چکیب داغی یادا.
بیزدن باغبان اولمادی،
تاپشیردیق باغی یادا.

عزیزی‌یم بو داغدا،
بۆلبول اوخور بوداقدا.
سار گلدی داغا قوندو،
هارای چکیر بو داغ دا.

قارغایارام او یادا،
او دۆشمنه، او یادا.
یاتیب یوخویا قالسام،
بیر کسیم یوخ اویادا.

عزیزی‌یم قولومدا،
قوّتیم یوخ قولومدا.
گؤر نئجه قاراباختام،
بو دا وارمیش یولومدا.

گۆل اکدیم گۆل مکاندا،
یئرین بیل، گۆل، مکاندا.
سن گۆلدون، من ده گۆلدوم،
من هاندا، گۆلمک هاندا؟!

عزیزیم آیرانسیزا،
آیران وئر آیرانسیزا.
ظۆلم ائوی آباد اولماز،
قالماز بو دؤران سیزه.

من عاشیق گۆل آلاندا،
گۆل بیتر گۆلالاندا
یاریم یادیما دۆشر
الیمه گۆل آلاندا.

اززی‌یم گؤزل مایا،
دؤنوبدو گؤز آلمایا.
عصره‌میش نر اؤلدوردون،
قانلیسان، گؤزل مایا!

قازاغین بوجاغیندا،
اود یانار اوجاغیندا.
عاشیق نئجه جان وئرسین
یادلارین قوجاغیندا؟

عزیزیم آغ چوخایا،
چال کیشی، آغ چوخایا.
منیم یاریم جاواندی،
وئردیلر آغ چوخایا.

دومان داغ آراسیندا،
شامما تاغ آراسیندا.
شام کیمی شؤعله چکدیم،
یاندیم یاغ آراسیندا.

بیر وئجسیز داشدی دۆنیا،
چۆروک آغاجدی دۆنیا.
کیمه دئییم دردیمی،
تامام قان-یاشدی دۆنیا.

عزیزیم یانار اودا،
پروانه یانار اودا.
دردیمی کیم ائشیتسه،
حالیما یانار او دا.

من عاشیقم، او دالا،
او بوداغا، او دالا.
وارمی اوجاغی سؤنن،
اۆرگیمدن اود آلا؟!

من عاشیق آهو زاردا،
جانیم دردده، آزاردا.
او گۆندن کی قول اولدوم،
ساتیرلار هر بازاردا.

باغدا بیان وارمولا،
گۆله زیان وارمولا.
سونسوزون بو گۆنونه
یازیخ دئین وارمولا؟!