بایاتی

اووجو بره‌ده دوروب،
بره اۆسته تور قوروب.
یاردان نئچه یارام وار،
هره‌سین بیر یول ووروب.

عزیزیم قوجاق-قوجاق،
اودون وئر قوجاق-قوجاق.
یوخسولون داخماسیندا
نه اود اولار، نه اوجاق.

ساققالینا دن دۆشوب،
دئ گؤروم ندن دۆشوب.
خالخا اوغلان دۆشنده
منه ده دده‌ن دۆشوب.

اوتورارام بینه‌ده،
تامبور چالدیم سینه‌ده.
اۆچ ایلدن بیر گؤرمه‌سم،
اونوتمارام یئنه ده.

آلمالار بوداق-بوداق،
یاراندیق بیز غم اوداق.
نئینه‌دیم کی، کۆسموسن،
باغلانیبدی دیل-دوداق.

عاشیقم یا خام الده،
اؤیرنیر یا خام ال ده.
توتدوم هیجران یاخاسین،
گؤردوم اؤز یاخام الده.

آی چؽخیب بیرجه بارماق،
گل سینه‌مه چکمه داغ.
یاریم مندن کۆسوبدو،
باغلانیبدی دیل-دوداق.

عاشیقم دردیمنده،
درد دئدیم دردیمنده.
گاه درد منی آپاریر،
گاهباگاه دردی من ده.

آی چؽخیب بیرجه بارماق،
گل سینه‌مه چکمه داغ.
یاریم مندن کۆسوبدو،
بیر چارا وار – یالوارماق.

گزمیشم، موروو، سنده،
گئتمز قار، قؽروو سنده.
یۆز ایل اووچولوق ائتدیم،
وورمادیم بیر اوو سنده.

دف چالان نازیک بارماق،
باشیندا قؽزیل قارماق.
قؽز، سانا لایقدیمی
منی بو درده سالماق؟

عمیم اوغلو بیچینده،
کؤینگی تر ایچینده.
گئتدیم ترین سیلمه‌یه،
قالدیم تیکان ایچینده.

تنهایی قارا گۆنده،
اوخورام قارا گۆنده.
منیم اوّل دفتریم،
یازیلمیش قارا گۆنده.

توتدوم باغی شرکه،
دیشله‌دیم اولدو لکه.
نئجه یامان اولورموش
یار اولمایان مرکه.

عاشیق قان آرا یئرده،
قصّاب، قان آرا یئرده.
اؤلدوردو جانان منی،
گئتدی قان آرا یئرده.

الیمده جامی بئله،
دولدور وئر جامی بئله
جانانی آیریلانین
قالیرمی جانی بئله؟!

گۆل-چیچک بیتن یئرده،
قومرولار اؤتن یئرده.
یئتیم باشی دینجه‌لر،
یاستیغا یئتن یئرده.

عزیزیم بو داغ ایله،
ائل گئدر بو داغ ایله.
نئجه قبره قویارلار
من اؤلسم بو داغ ایله؟!.

قو دوروب بۆرکو یئرده،
قالیبدی تۆکو یئرده.
جانیم اؤلسون، قورتارسین،
قالسین غم یۆکو یئرده.

باغیندا اۆزوم گیله،
وئر، سانا، دۆزوم گیله.
بی‌وفایا دوست اولدوم،
قویمادی اۆزوم گۆله.