بایاتی

چؽخدیم دیوار اۆستونه،
چئهیل مینار اۆستونه.
من سنه نئیله‌میشدیم –
گۆنو آلدین اۆستومه.

یار یاردان گئری قالماز،
یارین عهدی پوزولماز.
هئچ پروانه منیم تک
اؤزونو اودا سالماز.

من عاشیق دۆزوم یئره،
میرواری دۆزوم یئره.
کفنیم یؽرتیلیبدی،
سۆرتولور اۆزوم یئره.

عاشیقم اودا سالماز،
او خویدو، او دا سالماز،
هئچ پروانه منیم تک
اؤزونو اودا سالماز.

عزیزیم آیاز اولماز،
بولوددو، آیاز اولماز.
من کی غم اویلاغی‌یام –
درد مندن آیاز اولماز.

سار قونسا باغ دا دؤزمز،
خار دۆشسه تاغ دا دؤزمز.
یاردان آیری دۆشه‌نین
دردینه داغ دا دؤزمز.

داغلاردا بیان اولماز،
جان دوستا قؽیان اولماز.
یۆز ایل غۆربتده قالسام،
هاردادی دئین اولماز.

بو دؤران بئله گلمز،
دوغرو سؤز دیله گلمز
بیر آیا وعده وئرن،
آی دؤنوب ایله گلمز؟

باغیندا گیلاس اولماز،
مئیوه چوخ، گیلاس اولماز.
نه بلالی غولام من،
درد مندن خیلاص اولماز.

یار گلر یارا یئتمز،
سونالار سارا یئتمز.
پیس گۆندن قورتارماغا
آغلاماق چارا ائتمز.

گئجه اوزون، آی باتماز،
دردلیلر گئجه یاتماز.
منیم کیمی دردلینی
فلک بیر ده یاراتماز.

اوجادی باشین، کپز،
آغاریب قاشین، کپز.
دئ، بیر ندن قارالیب
سنین سال داشین، کپز؟

عزیزی‌یم گۆله ناز،
بۆلبول ائیلر گۆله ناز.
دؤران ائله دؤراندی،
آغلایان چوخ، گۆلن آز.

باغا گیردیم باغبانسیز،
دوه گؤردوم ساربانسیز.
عالمه درمان وئردیم،
اؤزوم قالدیم درمانسیز.

آراز، آراز، جان آراز!
من سنه قوربان آراز!
زامان منی یاندیردی،
سن ده آلیش، یان، آراز!

آی چؽخیبدی کنارسیز،
نیه منی قؽنارسیز؟
آچیب دئسم دردیمی،
اود توتارسیز، یانارسیز.

دولان گل یوردو، گۆلگز!
قالیبسان توردا گۆلگز!
من بوردا قان آغلاییم،
سن ده قال اوردا گۆل، گز.

بیر آی دوغدو کنارسیز،
گئنه گۆللم من آرسیز.
منیم آه-زاریمدان،
قاچین ائللر، یانارسیز!

عزیزی‌یم دولان گز،
بۆرون درده، دولان، گز.
نامرده ایمه بویون،
گئت غۆربتده دولان، گز.

پاپاغین قاباغی دۆز،
دالی دۆز، قاباغی دۆز.
دۆنیا، سندن کیم کئچدی،
قاشی دۆز، قاباغی دۆز.