بایاتی

یار یارا اهل-دیلدی،
یاریم دردیمی بیلدی،
غۆربته دۆشن گۆنو
بی‌وفا یار سئویندی.

عزیزیم نه دریندی،
دریالار نه دریندی.
من یارا نه دئدیم کی،
او، منیمله سریندی؟

یار گئتدی، جان کسیلدی،
عهدو پئیمان کسیلدی.
دؤرد یانی دۆشمن آلدی،
یول-ایز، هر یان کسیلدی.

ترخون اکدیم، تلخ ایندی،
ویران کؤنلوم، قالخ ایندی!
یاریمدان آیری دۆشدوم،
ساکیت اولسون خالخ ایندی.

کهرین سینه بندی،
اووچونون بینه بندی.
من درددن قاچاق اولدوم،
درد منده بینه‌لندی.

عزیزیم گده دردی،
گۆل اکدیم، گده دردی.
عالمی درد اؤلدوردو،
منی ده گده دردی.

کیم قوروبدو بو بندی،
سو گلدی باسدی کندی.
دؤران اگدی کامان تک
من یازیق دردیمندی.

نؤکرین یئکه دردی،
یۆکلنیب لؤکه دردی.
نر اولسا چکه بیلمز،
فیل گرک چکه دردی.

منیم یاریم گئدندی،
گۆل اۆزلو، گۆلبه‌دندی.
دئین مندن کۆسوبدو،
هئچ بیلمیرم ندندی؟

اززی‌یم ناماز دردی،
باغدان گۆل ناماز دردی.
خالخی الله اؤلدوردو،
منی آنناماز دردی.

بو داغلار کؤموردندی،
کئچن گۆن عؤموردندی.
گؤزلدن وفا اومما،
اۆرگی دمیردندی.

یئرین دئ، اکیم دردی،
دوغراییم، تؤکوم دردی.
درددن گۆجوم قالماییب،
من نئجه چکیم دردی؟

سؤز یوخ، دوعا گؤندردی،
اوخون سویا گؤندردی.
اؤزو غۆربتده قالدی،
قورو دوعا گؤندردی.

یار منه باخدی گئتدی،
قلبیمی یاخدی گئتدی.
آغلاماقدان گؤز یاشیم،
سئل کیمی آخدی گئتدی.

ائله‌می قووون دردی،
بوستانچی قووون دردی.
یؽغیلین، ائل-عقربا،
باشیمدان قووون دردی.

هر گلن باخدی گئتدی،
گۆل دردی، تاخدی گئتدی.
یار بو سؽنیق قلبیمی
اودلارا یاخدی گئتدی.

زامان گۆجون بیلدیردی،
گۆن گؤرمزی گۆلدوردو.
هره‌یه بیر گۆن وئردی،
منی درددن اؤلدوردو.

آغ دوه آغلی گئتدی،
زنجیرده باغلی گئتدی.
قویمادیلار کام آلیم،
یار قلبی داغلی گئتدی.

گلین بیر آش بیشیردی،
گؤزونده یاش بیشیردی.
بۆتون گۆنو ایشله‌دی،
ائله بیر داش بیشیردی.

بوردان بیر آتلی گئتدی،
آتین اویناتدی گئتدی.
گۆن کیمی شفق ساچدی،
آی کیمی باتدی گئتدی.