بایاتی

بیر جانیم وار کئچدیم من،
غم شربتین ایچدیم من.
فلک منه قارغادی،
سندن آیری دۆشدوم من.

فلکین داد الیننن،
جان اۆزدوم باد الیننن.
نه اؤلدوم، نه قورتاردیم،
بوردا فریاد الیننن.

شوخوم من، آی شوخوم من،
کیمین کؤنلون یاخیم من.
گیردیم یار باغچاسینا،
نه دردیم کی، چؽخیم من.

هارای ناشی الیننن،
آتماز داشی الیننن.
یاستیق شیکایت ائیلر
گؤزوم یاشی الیننن.

بو آرخلاری آتان من،
سویو سویا قاتان من.
کؤلگه‌لیک یادا قالدی،
گۆن آلتیندا یاتان من.

اوزاق گئتمه، قال مننن،
یاشیل مننن، آل مننن.
یا بو درده شریک اول،
یا بو جانی آل مننن.

بایقوش منم، بایقوش من،
هر قوشلاردان سای قوش من.
نه بلالی قوش اولدوم،
سؽزیلدارام یای، قؽش من.

بولاغین باشینا سن.
دیبی‌نین داشینا سن.
دۆگون قویدون، داغ چکدین
اۆرگیم باشینا سن.

نه باتمیسان قارا سن،
کؤنول یارا-یارا سن.
نه تۆکنمز درد اولدون،
نه ساغالماز یارا سن.

فلک، نئجه فلکسن،
باشا گتدین کلک سن.
یاریم الیمدن گئتدی،
داها نیمه گرکسن؟

عزیزی‌یم یارا سن،
کؤنول یارا-یارا سن.
نه ائله کؤمک اولدون،
نه های وئردین یارا سن.

من عاشیقم باغ اۆستن،
ائلات کؤچر داغ اۆستن.
بی‌وفا یار سینه‌مه،
داغی چکیب داغ اۆستن.

عزیزیم بئز تیکیبسن،
آغ دونون بئز تیکیبسن.
منیم گؤزوم سنده‌دی،
سن کیمه گؤز تیکیبسن؟

عزیزیم صفا گلدین،
خوش گلدین، صفا گلدین.
نه من اؤلدوم قورتاردیم،
نه سن اینصافا گلدین.

عزیزی‌یم گۆنده سن،
کؤلگه‌ده من، گۆنده سن.
جان آلماق بیر گۆن اولار،
جانیم آلدین گۆنده سن.

عزیزیم کسه گلدین،
یوللاری کسه گلدین.
وعده وئردین گلمه‌دین،
آغلادیم، سسه گلدین.

من عاشیقم کئشکه‌سن،
کؤرپو اۆستن کئشکه‌سن.
گلدین دردیم آرتیردین،
گلمه‌یه‌یدین کئشکه سن.

بو داغدا چکدیم اکین،
آلدیلار الیمدکین.
هئچ کافر، هئچ مۆسلمان،
اولماسین منیم تکین.

عزیزی‌یم ائنسن،
داغ باشیندان ائنسن.
دوستلوقدا نه اولدو کی،
اوزاقلاشدین یئنه سن؟

عاشیقین چوخدو سنین،
کیرپی‌یین اوخدو سنین.
یولوندا جان اۆزورم،
خبرین یوخدو سنین؟