بایاتی

باشیمدا کۆلاهیم وار،
سنین تک پناهیم وار.
گؤز گؤرور، کؤنول سئویر،
منیم نه گۆناهیم وار.

گئجم یار، گۆندوزوم یار،
اۆلکریم، اولدوزوم یار.
عالم قوجار یاریمی،
من قوجارام دیزیم یار.

هر بولاقدا گۆلون وار،
سنین تک پناهیم وار.
گیزلتمه، گل آچیق دئ،
اۆرگینده کیمین وار؟

الینده گۆل توتان یار!
آغ اوتاقدا یاتان یار!
سئودین، سئودین، ترک ائتدین،
الله‌دان بیر اوتان، یار!

داغ باشینا تؤکوب قار،
باغ-باغچایا چؤکوب قار.
بیر بۆلبولم قفسده،
دؤرد یانیمی آلیب سار.

پنجره‌دن باخان یار،
تئلینه گۆل تاخان یار.
سؤز وئریب، اۆز دؤندریب،
یاندیریبان، یاخان یار!

عاشیق دیاربادی‌یار،
خالین دیاربادی‌یار.
فلک توتدو قولومدان،
آتدی دیاربادی‌یار.

آی ساللانیب گئدن یار!
آرخالیغین ندن یار؟
سن کی بئله دئییلدین،
سنی بیر اؤیردن وار.

نه اؤلکه‌دی، نه دیار،
پئیمانین دئ، ندی یار؟
قویدون کمنده منی،
آتدین دیاربادی‌یار.

نه سؤزون وار دئدین یار؟
ساچلارین هؤرمه‌دین یار.
اۆرک آلیشدی، یاندی،
تۆستوسون گؤرمه‌دین، یار.

بو داغدا اوودادی یار،
اؤردک، قاز نوودادی، یار.
سؤز وئردین گؤرونمه‌دین،
بو نئجه سئودادی، یار؟

آراخچی‌نین یان قویار،
یان گؤتورر، یان قویار.
قاباقدا دوران اوغلان
اۆرگیمه قان قویار.

بیر گۆل وئردیم آلدی، یار،
بوینوما قول سالدی یار.
دۆشمن یولومو کسدی،
ائوده یالقیز قالدی یار.

خؽنانی تئلدن قویار،
کمری بئلدن قویار.
گؤزوم گؤرمز او یاری،
سئودیگین الدن قویار.

عزیزیم مارالیم یار،
گؤزوم یار، قارالیم یار.
نئجه روا گؤرورسن،
گۆل تکین سارالیم، یار؟

دریا سوسوزمو قالار؟
دیبی قومسوزمو قالار؟
دۆنیادا ساغ آدامین
کؤنلو یارسیزمی قالار؟

گؤللرده وار باغالار،
اۆرکده داغداغالار.
یارین ووردوغو یارا
محشر گۆنو ساغالار.

بو باغلار هرم باغلار،
گۆلو یوخ، درم، باغلار.
زامانا بئله گئتسه،
اۆرگیم ورم باغلار.

حالالار، آی حالالار،
داغدا لاچین بالالار.
آنا بالاسین وئرمز،
بلکه زورلا آلالار.

دۆشوبدو پرن باغلار،
کؤلگه‌سین سرن باغلار.
گۆنلریم بئله کئچسه،
اۆرگیم ورم باغلار.