بایاتی

یاد گلدی، دولدو داغلار،
سارالدی، سولدو داغلار.
اۆرگیمین اودوندان
یاندی، کۆل اولدو داغلار.

عاشیقم یۆز گۆن آغلار،
قاش، گؤزو سۆزگون آغلار.
یاریندان علی چؽخان
بیر گلسه، یۆز گۆن آغلار.

بوستان آغلار، لک آغلار،
غریب دردین تک آغلار.
ائله درده دۆشموشم،
آیاق آلتدا خاک آغلار.

من عاشیقم یار آغلار،
یولوم کسدی یاراغلار.
آیریلیق، یقین اولا،
من آغلارام، یار آغلار.

خار الیندن گۆل آغلار،
گۆل آغلار، سۆنبول آغلار.
باغچایا خزان گلسه،
یاش تؤکر، بۆلبول آغلار.

عزیزیم نه خاندیلار،
نه سولطان، نه خاندیلار.
آپاردیلار یاریمی،
تایفالیقجا داندیلار.

عزیزی‌یم قان آغلار،
قان-یاش تؤکر، قاناغلار.
یار یارا ساز اولماسا،
دردینی پۆنهان آغلار.

یول کسیب حارامیلار،
درد چکیر یارالیلار.
سیز الله، یار جاواندی،
دگمه‌یین، حارامیلار!

عزیزیم یا سارایلار،
یاپیلمیش یا سارایلار.
اۆستومه هۆجوم ائتدی
پیس گۆنلر، یاسسار آیلار.

یؽغیلیب اوتورانلار،
دردیمی آرتیرانلار،
منه بیر چاره دئیین،
بو درددن قورتارانلار.

من عاشیقم هر آیلار،
هر هفته‌لر، هر آیلار.
باشیم جلّاد الینده،
دیلیم سنی هارایلار.

گۆن دولانار، آی اولار،
پیس گۆن آیا تای اولار.
هاردا کی شاهلیق اولدو،
جلّاد اولار، وای اولار.

بو داغدا خال-خال اویلار،
اوو گزر، خال-خال اویلار.
فلک ووردوغو یارا
سینه‌می خال-خال اویلار.

داغلاردا قار، قؽش اولار،
کؤنلومه قار، قؽش اولار
سونسوزون شیرین سؤزو
فلکه قارغیش اولار.

عزیزیم آلمادیلار،
یوللادیم، آلمادیلار
جان قویدوم بو قفه‌سه،
یالواردیم آلمادیلار.

آ قوشلار، آغا قوشلار،
قونوبدو باغا قوشلار.
کسدیلر آغاجلاری،
اوچوشدو داغا قوشلار.

اۆرکده یارا سؽزلار،
هوولانیب یارا سؽزلار
یارالیلار دردینی
نه بیلر یاراسیزلار.

ائل بو داغدا یا قؽشلار،
یا کؤچ ائلر، یا قؽشلار.
باشیم جلّاد الینده،
نه وورار، نه باغیشلار.

سارواندا مایا بوزلار،
نر بوزلار، مایا بوزلار.
منیم قوروموش دیلیم
هردن بیر وایا بوزلار.

عزیزی‌یم قان دامار،
آری وورار، قان دامار.
کاسیبلیق آدین چکمه،
اۆرگیمه قان دامار.