بایاتی

عاشیق قارامان چکر،
خالی قارامان چکر.
یارین ساووق اۆزوندن
داغدا قار آمان چکر.

گلیر قارا گئجه‌لر،
باغری یارا گئجه‌لر.
قلبی داش، اینصافسیز یار،
درده چاره گئج ائلر.

آشیق گزر، گرد ائلر،
دولانار، وارگرد ائلر.
اوروجلوق آیی گلدی،
یوخسول هر گۆن درد ائلر.

گئجه‌لر، ایل گئجه‌لر،
دردیمی بیل، گئجه‌لر.
من بوردا قان آغلاییم،
سن اوردا گۆل گئجه‌لر.

آهولار مه‌لر گلر،
داغلاری دلر گلر.
بی‌وفا یار الیندن،
گؤر باشا نه‌لر گلر؟

آراز داشدی دئدیلر،
کۆر قاریشدی دئدیلر.
ملهه‌می یارامادی،
حکیم قاشدی، دئدیلر.

آشیق الده ساز گلر،
اؤردک اوچار، قاز گلر.
یوخسول پیس گۆن کئچیرر،
گؤزله‌یر کی، یاز گلر.

بوستانی لکله‌دیلر،
تاغینی تکله‌دیلر.
دۆشدوم نادان الینه،
نازیمی چکمه‌دیلر.

آراز باشدان لیل گلر،
دسته-دسته گۆل گلر.
نئیلرم بئله یاری،
آیدا، ایلده بیر گلر.

چکمه‌نی چکمه‌دیلر،
چک دئدیم، چکمه‌دیلر.
دۆشدوم غم دریاسینا،
الیمدن چکمه‌دیلر.

سئل آخار، مه‌لر گلر،
داغ-داشی دلر گلر.
دۆشمن گلدی، ایندی گؤر
باشیما نه‌لر گلر.

دریادا ماهنی نئیلر؟
گردان سۆراهی نئیلر؟
آیریلیق اؤزونده‌دیر،
بونا ایلاهی نئیلر؟

آشیق یولون چاش گلر،
گؤزلریندن یاش گلر.
یوخسول یاغیش گؤزله‌یر،
گؤیدن یئره داش گلر.

عزیزی‌یم کۆل ائیلر،
اوجاق یانار کۆل ائیلر.
وارلی یوخسول باشینا
یومروق وورار، کۆل ائیلر.

باغدا مارال چاش مه‌لر،
چاش دولانار، چاش مه‌لر.
منیم آهو-زاریمدان
داغ اینیلدر، داش مه‌لر.

گؤزللر گۆزگو نئیلر؟
باش بزر، گۆزگو نئیلر؟
غمه غرق اولان کؤنول،
غم سنی اۆزگون ائیلر.

عزیزی‌یم سس ائیلر،
قوشلار اوچار، سس ائیلر.
یار الیندن دردلی‌یم،
بو درد منه بس ائیلر.

سو آخار، لیللندیرر،
باغچانی گۆللندیرر.
دردلی‌یه سؤز دئمه‌یین،
درد اونو دیللندیرر.

درد منی ماییف ائیلر،
اؤلدورمز زاییف ائیلر.
دۆشمن گؤرر، شاد اولار،
دوست گؤرر، «حاییف» ائیلر.

من عاشیقم یار گۆلر،
میزراب اوینار، تار گۆلر.
سونا گؤلدن کۆسنده
ترلان آغلار، سار گۆلر.