بایاتی

آی دولانیر گۆن-گۆنه،
یار تلسیر گۆن-گۆنه.
ساچلارینا دن دۆشوب،
جاوانلاشیر گۆن-گۆنه.

هماییلین ساری‌سی،
گۆموشدندی یاری‌سی.
آروادلارین اری وار،
قؽزلارین دا تاری‌سی.

ایستکانین ساری‌سی،
ایچدیم قالدی یاری‌سی.
ارلیلرین اری وار،
ارسیزلرین تاری‌سی.

آی گلین، گؤزوم گلین،
ایشلرم اؤزوم گلین.
نئیله‌سین قایناناسی،
تنبلدیر بیزیم گلین.

عزیزی‌یم آت آلی،
آتین ساتان آت آلی.
گۆلمه منیم حالیما،
من یئتیم، سن آتالی.

داغدا صیّاد سینیبدیر،
اووون یئرین بیلیبدیر.
سن اکدی‌یین آغاجلار
چوخداندیر کسیلیبدیر.

یایلیغیم کیلکم-کیلکم،
یویورام سیلکم-سیلکم.
منی سنه وئرمزلر،
من بیر داوالی مۆلکم.

گمی گلیر لنگ گلیر،
ایچی دولو قند گلیر.
گلین بیر سؤز دئینده
قاینانایا درد گلیر.

هانی او دردی یازان،
دردیندن اولدوم اوزان.
یئین گۆلجاهان اولسون،
سن زحمتله پول قازان.

گلین گلیر خان گلیر،
ائولری یؽخان گلیر.
الینده اۆلگوج-تیه،
باشلاری قؽرخان گلیر.

قاشلارین چاتان اوغلان،
کؤینگی کتان اوغلان.
نیشانلین آپاردیلار،
بیخبر یاتان اوغلان.

داغلار باشی ایشیقدیر،
یار الینده قاشیقدیر.
قاینانام سئومه‌سه ده،
اوغلو منه آشیقدیر.

تاپما دن، ایتیرمه دن،
هر مۆرغه یئتیرمه دن.
ائشیتدیم رقیب اؤلموش،
قورتولدوم ایت اۆرمه‌دن.

داغدان آران یاخشیدیر،
تیرمه خاران یاخشیدیر.
بویون گؤدک، گؤزون توم،
سنین هاران یاخشیدیر.

من عاشیق خانه بادا،
گئدیبدیر خانه بادا.
ظالیما بیر سؤز دئسم،
سۆررلر خانابادا.

تبریز اۆستو داشلیدی،
تورپاغی زر قاشلیدی.
دیندیرمه‌یین تبریزی،
گؤزلری قان یاشلیدی.

منیم بالام، آز آغلا،
پاییز آغلا، یاز آغلا.
آل قلمی الینه،
دردیم دئییم یاز، آغلا.

سو گلدی، داش آپاردی،
گؤزلری یاش آپاردی.
یادئللیلر یاد ائله
یاری بیرباش آپاردی.

آتیلیر توپ قوشونا،
میندیلر آغ ماشینا.
نه اینصافسیز ظابیطدیر،
باخماییر گؤز یاشینا.

داغدا زریش کوللاری،
چاپار توتوب یوللاری.
یار دردین نئجه یازسین،
باغلانیبدیر قوللاری.