بایاتی

عاشیقم یارا من ده،
درد منده، یارا منده.
یولوندا جانیم وئردیم،
یارادیم یارا من ده.

آراشقی‌نین تپنده،
اۆزه گۆلاب سپنده.
کؤنلوم مورادا یئتر
آغ اۆزوندن اؤپنده.

بۆلبول گۆلدن کۆسنده،
کۆسر گئدر سۆسن ده.
بیر سؤز دئدیم قؽزاردین،
نه قایدادیر بو سنده؟

رئیحانی اکدیم دۆزه،
گؤیره‌دی، قالخدی دیزه.
الله، سانا چوخ شۆکور،
یار اۆزون چؤردو بیزه.

داغلارا چن دۆشنده،
سۆنبوله دن دۆشنده.
روحوم بدنده اوینار
یادیما سن دۆشنده.

من عاشیقم اۆز-اۆزه،
سونام گؤلده اۆز-اۆزه.
قوووشاسان یارینا،
سؤیکه‌یه‌سن اۆز-اۆزه.

عزیزیم بیرده-بیرده،
نه سیرّ وار بو صبیرده.
من ده سنینله اؤلوم،
قویسونلار بیر قبیرده.

من عاشیقم بیر اۆزه،
اؤردک گؤلده بیر اۆزه.
باغبان، یاد قویما باغا،
بیر سؽندیرا، بیر اۆزه.

من عاشیقم گۆلگزه،
بۆلبول گزه، گۆل گزه.
باغدا قوی بۆلبول گزسین،
آیاغی یوخ گۆل گزه.

گلیردیم سۆزه-سۆزه،
قؽزیلگول اۆزه-اۆزه.
یار منه قاش-گؤز آتدی
تئللرین دۆزه-دۆزه.

کاروان گئدیر تبریزه،
یولو چؽخیبدی دۆزه.
دۆنن دئدین گلمه‌دین،
بو گۆن باری گل بیزه.

عزیزی‌یم مینایه،
گله قوربان، مینایه.
سندن ال گؤتورمرم،
گؤیدن گله مین آیه.

یوخ عاشیق کیمسه‌سیزه،
رحم ائیله کیمسه‌سیزه.
نه گؤیده ملک بنزر،
نه یئرده کیمسه سیزه.

من عاشیق ترسی نه‌یه؟
تر دامار تر سینه‌یه.
خسته‌نین گؤزو دۆشموش،
یئتیشمیش تر سینه‌یه.

یار زۆلفون تؤکوب اۆزه،
ساللانیر سۆزه-سۆزه.
گئجه کئچدی گلمه‌دی،
اۆمید قالدی گۆندوزه.

یار گلیب یار گؤرمه‌یه،
عؤمرونو تار گؤرمه‌یه.
من باغچایا گلمزدیم،
گلدیم نوبار گؤرمه‌یه.

من عاشیقم یا دۆزه،
یا چمنه، یا دۆزه.
سنسن عؤمرون قؤنچه‌سی،
قویاراممی یاد اۆزه!

ائله‌می دۆشمز اله،
سار اوچار، دۆشمز اله.
منیم سئودیگیم بو یار،
یۆز ایل گز، دۆشمز اله.

تانری، منی قوش ائله،
قانادیم گۆموش ائله.
دار دوققازدا، دار یولدا،
یاری منه توش ائله.

آی قؽز، چؽخما چکیله،
چیت کؤینگی سؤکوله.
بو جانیم قوربان اولسون
قؽز، سنده‌کی شکیله.