بایاتی

داغ اۆسته اکین اولماز،
عکسن ده اکین اولماز.
یؽغیلسا مین بیر گؤزل،
بیری سن تکین اولماز.

گئجه اوزون، آی باتماز،
وفالی یار یار آتماز.
سن تک بیر چیناربوو
تانری بیر ده یاراتماز.

داغلاردا اکین اولماز،
هئچ کس من تکین اولماز.
سن یانیما گلمه‌سن،
اۆرگیم سکین اولماز.

گۆن دوغماسا آی باتماز،
دردلیلر گئجه یاتماز.
عالم منی آتسا دا،
سئوگیلیم منی آتماز.

دوست گلسه یاد یاندیرماز،
اسسه ده باد، یاندیرماز.
ائله کی سن یاندیردین،
هئچ وعده اود یاندیرماز.

گئجه اوزون آی باتماز،
سئونلر ائوده یاتماز.
جانانیمتک بیر جانان
خودام بیر ده یاراتماز.

قاراباغدا قوش دورماز،
دردلی باشدا هوش دورماز.
یاری هر یئرده گؤرسم،
یانمیش دیلیم دینش دورماز.

گل عاشیقی داغدا گز!
دۆگونده گز، داغدا گز!
عقلیمی زۆلفون کیمی
داغیدانی داغدا گز!

داغلاردا ناشی دورماز،
سئل گلر، داشی دورماز.
گؤزلریم گؤزلرینه
باخماسا یاشی دورماز.

حور-غؽلمان کیمی گز،
تار چالانسان، سیمی گز.
اۆرگین منده اولسون،
اؤزون ترلان کیمی گز.

جئیرانین دۆزه گلمز،
یول گئدن ایزه گلمز.
گیزلتمه آی اۆزونو،
قوی باخیم گؤزه گلمز!

دام اۆسته‌دی دامیمیز،
قوشادی ائیوانیمیز.
سن اوردان باخ، من بوردان،
کور اولسون دۆشمانیمیز.

کهری سۆرن گلمز،
ساچ-یالین هؤرن گلمز.
یار گئدنده سؤز وئردی،
ندندیر، گؤرن، گلمز؟

دام اۆسته‌دی دامیمیز،
سوورولدو خؽرمانیمیز.
وفالی یار یولوندا
قوربان اولسون جانیمیز.

باغا گیرمنم سنسیز،
گۆلو درمنم سنسیز.
اوخ دگیب، قانیم تؤکسه،
یئنه بیلمنم سنسیز.

جمیع گئتدی فانارسیز،
یۆکون ووردوم دینارسیز.
مندن اوزاق دولانین،
سیز ده من تک یانارسیز.

عاشیق اولدوم تئله قؽز،
کمر باغلا بئله، قؽز.
اونو گۆجنن تاپمیشام،
آنا دوغماز بئله قؽز.

آی چؽخیبدی کنارسیز،
گزمک اولماز فانارسیز.
گؤز گؤردو، کؤنول سئودی،
نیه منی قؽنارسیز؟

عزیزی‌یم ساری قؽز،
ساری کؤینک، ساری قؽز.
ممن جنّت مئیوه‌سی،
اؤزون دۆنیا مالی، قؽز.

عاشیق اولوب یارا گؤز،
ترلان تیکر سارا گؤز.
آغلیم باشیمدان آلدی
منیم بیر جۆت قارا گؤز.