بایاتی

ائله‌می سیاد علی،
اوو اوولار سیاد علی.
سرت یئرین ترلانی‌یام،
دگمه‌میش سیاد علی.

آرخالیغی بیچدیمی؟
اۆستونده آند ایچدیمی؟
بیر ده گؤروش آرزوسو
اۆرگیندن کئچدیمی؟

عزیزینم یاد علی،
یا دیوانه، یا دلی.
محشریم او گۆن قوپار،
یارا دگسه یاد علی.

آچیلمیشام گۆل کیمی،
اوخورام بۆلبول کیمی.
دگمه منیم کؤنلومه،
ساراللام سۆنبول کیمی.

باغیندا ها صندلی،
من دلی، ها سن دلی.
گۆلگز، یارانا دگسین
طبیبین هاساند علی.

اوتوروبسان گۆل کیمی،
سؤیلورسن بۆلبول کیمی.
نه دالدادان باخیرسان
ساتین آلما قول کیمی.

گلدی بیر یۆز مزه‌لی،
لب شیرین، یۆز مزه‌لی.
قاسیم وفالی یاردان
اؤلونجه یۆزمز علی.

زۆلفون سودا مار کیمی،
اوینار سو دامار کیمی.
سؽزیلداتدین عاشیقی،
یاغا سو دامار کیمی.

ائله‌می آی اینجه‌لی،
یول گئدر آی اینجه‌لی.
سنی آختاران گؤزوم
نه یاتار نه دینجه‌لی.

یاغارام یاغیش کیمی،
اثرم قامیش کیمی.
اۆرگیم سنی ایستر
تر-تزه یئمیش کیمی

عزیزیم اینجه‌لیمی،
اریییب اینجه‌لیمی.
چؽخسام، بویوم گؤرونسه،
گؤزلرین دینجه‌لیمی؟

من عاشیق یاسه‌مه‌نی،
اۆزوبسن یاسه‌مه‌نی.
قانریلیب گئری باخدین،
باتیردین یاسا منی.

یار قویدو باغدا منی،
نه آغیر چاغدا منی،
اؤلسم مجنونتک اؤلوم،
گزسینلر داغدا منی.

من عاشیق ائلچی منی،
ائل یایلاق، ائل چیمه‌نی.
او قاش، او گؤز، او کیپریک
سالیبدی ائلچی منی.

عزیزی‌یم، یا منی،
قؽز، قاشلارین یمه‌نی.
یا اؤلدور، جانیم قورتار،
قبول ائیله یا منی.

داغلار داغلادی منی،
گؤرن آغلادی منی.
زنجیر بوخوو تاب ائتمز،
زۆلفون باغلادی منی.

تاپمیسان گۆلده منی،
گؤرورسن ایلده منی.
دئدین سنی سئویرم،
سئویرسن دیلده منی.

سؤز دئدین، آلدی منی،
چؤللره سالدی منی.
زۆلفون شاهمار ایلاندی،
ال ووردوم، چالدی منی.

ائله‌می درده منی،
قوربان کس مرده منی.
او گئدن نازلی صنم
سالیبدی درده منی.

اۆزدو قئیلو-قال منی،
هردن یادا سال منی.
من سنی مرد بیلمیشم،
نامرد اولما، آل منی!