بایاتی

قؽزیل اۆزوک لاخلادی،
وئردیم آنام ساخلادی.
آناما قوربان اولوم،
منی تئز آداخلادی.

آغ آلما آللانیبدی،
آغاجدان ساللانیبدی.
من سنه نه دئدیم کی،
گۆل اۆزون خاللانیبدی؟

کاروان یولون توشلادی،
داغدان ائندی قؽشلادی.
عهدیندن دؤنن یاری
یئنه یار باغیشلادی.

یار قاپینی آچیبدی،
نولوب رنگین قاچیبدی؟
دور گل بیزیم باغچایا،
گؤر نه گۆللر آچیبدی.

توت آغاجی دامادی،
یولوم خیابانادی
اگیل اؤپوم اۆزوندن،
قارا تئللر یانادی.

آشیغین یولو داغدی،
باغبانین مئیلی باغدی.
چکه‌جک یار قهرینی،
نه قدر جانی ساغدی.

عزیزیم یۆز قان آدی،
ترلانین یۆز قانادی.
زۆلفونه قاداغا وئر،
توخوندو، اۆز قانادی.

بو داغ یارا داغیدی،
چکمه، یارا داغیدی.
الینی سۆرت باشیما،
الین یارا داغیدی.

هئیأتلری نانادی،
قولاغیندا تانادی.
اگیل اۆزوندن اؤپوم،
عجب خلوتخانادی.

بو گلین هارالیدی؟
داغلارین مارالیدی.
گل کؤنلومو قؽرما سن،
اۆرگیم یارالیدی.

باغچا گۆلون جانیدی،
قؽزیلگول خؽرمانیدی.
یارین اینجه گۆلوشو
خسته‌لر درمانیدی.

آراز باشدان آزالدی،
اۆستون اؤردک، قاز آلدی.
اولان-اولماز هوشومو
گئدن سرویناز آلدی.

پاییز یازدان یاخشیدی،
اؤردک قازدان یاخشیدی.
تویدا بیر گلین گؤردوم،
والله، قؽزدان یاخشیدی.

بو نه گؤزل جامالدی،
الدن گؤزل جام آلدی.
عشقه اۆرجاه ائیله‌ین
منی، گؤزل جامالدی.

قالا بیزیم اولایدی،
داشی قؽزیل اولایدی.
یارا قوناق گئدنده،
گئجه اوزون اولایدی.

شامامالار سارالدی،
تاغدان دۆشدو قارالدی.
هامینی درد اؤلدوردو،
منیم جانیم یار آلدی.

ائیوان بیزیم اولایدی،
دیره‌یی قؽزیل اولایدی.
یاریم بیزه گلنده
قوربان قوزوم اولایدی.

یار منی یادا سالدی،
داغلارا صدا سالدی.
گلدی هامی‌یا چاتدی،
آپاردی اودا سالدی.

آلما بوداقدا قالدی،
قؽزلار اوتاقدا قالدی.
بیر اؤپدوم، بیر دیشله‌دیم،
دیشلر یاناقدا قالدی.

ائله‌می گۆل آچیلدی،
یاز گلدی، گۆل آچیلدی.
رنگین ندن دگیشدی،
آل اولدو، گۆله چالدی.