بایاتی

قاراباغین آلچاسی،
دؤشنیبدی خالچاسی.
بیر گؤزل قؽز سئومیشم،
قؽزیلگولون قونچاسی.

قارشیمیزدا قانا تای،
ترلان چالار قانات آی.
بیر جۆت خال وار اۆزونده،
هر بیری بیر جانا تای.

پناهی، او پناهی،
زۆلف اۆزون او پناهی.
سنسن کعبه سارایی،
چکرمی اؤپن آهی؟

عاشیق گؤز آلا گرک،
کاباب کؤز آلا گرک.
قاش قارا، کیرپیک قارا،
اۆز آغ، گؤز آلا گرک.

آراز آخیر قؽیقاجی،
بو گلن ایکی باجی.
بیری اؤز سئوگیلیمدی،
بیری اونون دیلمانجی.

عاشیق بیری‌یله گرک،
گؤهر دۆری‌یله گرک.
دۆنیادا گؤزل چوخدو،
ایلقار بیری‌یله گرک.

عزیزی‌یم خان گرک،
جان اودا یاخان گرک.
آچیلدی کؤکسون بندی،
گؤروندو یاخان گرک.

آتداندیق دۆشنده نال،
آت گئتمز، دۆشنده نال.
عاشیق، دردینه درمان
وار، درده دۆشندن آل!

قار یاغیر کۆرک-کۆرک،
داملاری دیرک-دیرک.
قونشودا بیر قؽز گؤردوم،
اؤپمه‌یه اۆرک گرک.

عزیزی‌یم نارین آل،
هئیواسین آل، نارین آل.
گل منه بیر رحم ائیله،
اۆرگیمین نارین آل.

قارشیمیزدا تک اتک،
یار باغریمی تکه تک.
قاپیندا کلبین اولوم،
تک منه دگسین اتک.

اووچو-اووچو ها مارال،
بودو گئتدی ها مارال.
بئله جان آلماق اولماز،
جان آلیرسان، هامار آل.

گل اوتوروب چای ایچک،
گؤی آتلاسدان دون بیچک.
ایلقار اۆسته دورماغا
قرآن گتیر، آند ایچک.

گئت بازاردان اینجیر آل،
ساعتینا زینجیر آل.
اوزاق یولدان گلیبسن،
گیر قوینوما دینجین آل!

عزیزی‌یم بیر-بیر چک،
سۆرمه گؤتور بیر-بیر چک.
اؤلسم قانلیم اولاجاق،
بیر قاش، بیر گؤز، بیر بیرچک.

قاپیدا دورما، گؤزل،
بوینونو بورما، گؤزل.
ساخلا مۆژگان اوخونو،
سینه‌مه وورما، گؤزل.

بارماغیمدا بیر اۆزوک،
ساغ قولومدا بیلرزیک.
من اونا قوربان اولوم،
بوینومدان بئلی نازیک.

عزیزیم گۆلدن گؤزل،
اوخور بۆلبولدن گؤزل.
یار منه بیر گۆل وئریب،
اؤزو او گۆلدن گؤزل.

یار گئیینیب تامام آل،
تامام یاشیل، تامام آل.
بو یاریمچیق جانیمی
رحمین یوخسا، تامام آل.

دسته‌دن اۆزول، گؤزل،
سؽرایا دۆزول، گؤزل.
سن گؤندرن نامه‌نی
ساخلارام یۆز ایل، گؤزل.