بایاتی

قؤنچه گۆلم، باغدانام،
تر لاله‌یم، داغدانام.
بوستانچیدان خبر آل،
دئسین هانسی تاغدانام.

ائل ایچینده بئکارام،
چتریم اۆزه تؤکرم.
اؤزگه‌لره خان اولسام،
اؤز یاریما نؤکرم.

گل منیم آتام، آنام،
دردیندن یاتانمانام.
قوینوندا جۆت ممه‌لر،
ترله‌میش توتانمانام.

عزیزی‌یم آتمارام،
یاری یادا ساتمارام.
آند اولسون یارادانا،
یادیمدان چؽخارتمارام.

دریا اوللام، بولاننام،
سوجاق اوللام، سولاننام.
ساغ گؤزوم سنه قوربان،
سول گؤزومله دولاننام.

یارالی‌یام، یاتمارام،
دردی باتمان-باتمانام.
یار گؤندرن بو دردی
هئچ بیر درده قاتمارام.

داغ-دره‌نی دولاننام،
دریا کیمی بولاننام.
گؤزلریم سنه قوربان،
من گؤزسوز ده دولاننام.

گئدرم، اوتورمارام،
آجی سؤز گؤتورمرم.
یۆز ایل عؤموردن گئتسه،
سندن ال گؤتورمرم.

چئشمه اوللام، بولاننام،
داغلاری دؤرد دولاننام.
الین الیمه وئرسن،
سائیل اولوب دیلننم.

چایلار تکین آخمارام،
باشا حنا یاخمارام.
بیر دفعه اۆزون گؤرسم،
آیا، گۆنه باخمارام.

آراز کیمی بولاننام،
باغچا کیمی سولاننام.
الیم سنه چاتینجا،
کت-کت گزیب دولاننام.

نیلوفرم، آچمارام،
عطریم بیجا ساچمارام.
یار یولوندا باش قویسام،
اؤز عهدیمدن قاچمارام.

سؽزیلدار بئجه یارام،
درد وئرر گئجه یارام.
ائل بیلیر، عالم بیلیر،
من سنه نئجه یارام.

بیر کسیم یوخ، ناچارام،
هر قاپی‌یا آچارام.
آتان، آنان وئرمه‌سه،
آللام، سنی قاچارام.

دریا تک بولانمارام،
دریادان سولانمارام.
عالم سنسیز دولانسا،
من سنسیز دولانمارام.

من عاشیق کیمه بندم،
سازیمدا سیمه بندم.
یارلا گؤروشمک اۆچون
بیر کیچیک هیمه بندم.

ناچارام من، ناچارام،
باغلی قاپی آچارام.
یار گؤزون یاشلی گؤرسم،
باش گؤتوروب قاچارام.

آرازام، کۆره بندم،
بۆلبولم، گۆله بندم.
من گئدرگی قوناغام،
بیر شیرین دیله بندم.

هیجران داغین آشارام،
دومان گلسه چاشارام.
من بیر قاینار قازانام،
اودون آز قوی، داشارام.

احمدم، کعبه‌ده‌یم،
کعبه‌یم، کعبه‌ده‌یم.
ایلده بیرجه هج اولور،
من گۆنده کعبه‌یم.