بایاتی

من عاشیق بالا جانیم،
حسرتده قالا جانیم.
یارین آلا گؤزلری
ایستر کی، آلا جانیم.

قؽزیلگول اویوم-اویوم،
دریم سینه‌مه قویوم.
بۆلبول گۆلدن دویماییر،
من سندن نئجه دویوم.

من عاشیق یارا جانیم،
قورباندیر یارا جانیم.
توتوم، قویوم قفه‌سه،
گؤندریم یارا جانیم.

داغ آشدیم، سالا دۆشدوم،
نه یامان حالا دۆشدوم.
یار خلوت بیزه گلدی،
گؤردولر، قالا دۆشدوم.

اززی‌یم یازدی جانیم،
آل قلم، یاز دی جانیم.
بۆلبولو باغدا گؤروب،
دئییر کی، یازدی جانیم.

داغ آشدیم، یانا دۆشدوم،
گئجیکدیم، بانا دۆشدوم.
یاردان بوسه ایسته‌دیم،
ائله بیل قانا دۆشدوم.

درد گؤلونده اۆز، جانیم،
دردی ساپا دۆز، جانیم.
یارا قوربان وئررم،
اگر اولسا یۆز جانیم.

عاشیقه دۆشدو گؤزوم،
کابابا دۆشدو گؤزوم.
باخدی، یاری گؤرمه‌دی،
گؤزومدن دۆشدو گؤزوم.

ائله‌می باختی‌یاریم،
باخ ائلیم، باخ دیاریم.
اۆزونده گؤز ایزی وار،
سنه کیم باخدی، یاریم؟

باغیندا واردی اۆزوم،
دیللرده گزدی سؤزوم.
یاری بیکئف گؤرونجه
کاش کی، چؽخایدی گؤزوم.

بارماغی اۆزوک یاریم،
قولو بیلرزیک یاریم.
اگیل، اۆزوندن اؤپوم،
دوداغی نازیک یاریم.

باشینا نئجه دؤنوم؟
دولانیم، نئجه دؤنوم؟
ترسا دینیندن دؤنمز،
من سندن نئجه دؤنوم؟

قؤنچه ایدیم، گۆل اولدوم،
بوی آتدیم، سۆنبول اولدوم.
بیر دیلبیلمز قوش ایدیم،
اوخودوم، بۆلبول اولدوم.

جانیم او باغا قوربان،
گلن قوناغا قوربان.
قاشا-گؤزه حئیرانام،
بۆللور بوخاغا قوربان.

گۆلو بیچه‌نه قوربان،
سویو ایچنه قوربان.
کیشمیر گئییب ساللانیب،
بوردان کئچه‌نه قوربان.

عزیزی‌یم یا خاندان،
یا سولطاندان، یا خاندان.
آچیلدی سینه‌ن بندی،
ممن چؽخدی یاخاندان.

من عاشیق، سؤزوم قوربان،
قوی اولسون گؤزوم قوربان.
یارا قوربان نه لازیم،
من اونا اؤزوم قوربان.

من عاشیقم یاخان دان،
یا سولطاندان، یا خاندان.
بیر دسته گۆل اولایدیم،
آسیلایدیم یاخاندان.

ساماواری قاینادان،
اۆسته چاینیک اوینادان.
اگیل اؤپوم اۆزوندن،
قاش آلتدان گؤز اوینادان.

عزیزی‌یم او خاندان،
او سولطاندان، او خاندان.
سنده بیر جۆت نار گؤردوم،
گؤز چکمرم یاخاندان.