بایاتی

خزل اولدو گؤی باغلار،
گؤی باغچالار، گؤی باغلار.
گؤزلده نه قایدادی،
آغ بوخاغا گؤی باغلار.

آغاجدا وار مازیلار،
کؤنلوم سنی آرزولار.
اگیل اۆزوندن اؤپوم،
قوی باخسین تامارزیلار.

عزیزیم گۆلو باغلار،
آچیبدی گۆلو باغلار.
اؤزون بیر سونا دیلبر،
دیلین بۆلبولو باغلار.

الینده پای نه اولار،
قاشلارین یای نه اولار.
قول دولاییب بوینونا،
قوجاسان، آی نه اولار!

یار باغچادا باش باغلار،
زۆلفون یویار، یاش باغلار.
گاه گۆلر، گاه دانیشار،
گاه باغرینا داش باغلار.

بولاق باشی توز اولار،
اۆستو دولو قؽز اولار.
اگیل دسمالین گؤتور،
من گؤتورسم سؤز اولار.

بولاق باشی توز اولار،
اۆستو دولو قؽز اولار.
من سنه گۆل دئمرم،
گۆلون عؤمرو آز اولار.

قارشیمیزدا، آ چاپار،
غمزه‌ن منی آ چاپار.
صفیل گؤرسن عاشیقی،
کلبین دیه، آچ آپار.

داغ باشینا چؽخارلار،
آیا دم-دم باخارلار.
عشقدن ائو تیکسن ده،
ائوین بیردن یؽخارلار.

ساماوار جه-جه وورار،
اۆستونده نیمچک دورار.
قوربان اولوم قارداشا،
آت اۆسته گؤیچک دورار.

باغدا گۆلو یار سولار،
کؤنلوم یاری آرزولار.
گیزلتمه گۆل جامالین،
قوی باخسین تامارزیلار.

قاشلارین قاتار-قاتار،
کیرپیکلرین اوخ آتار.
قوینون عطّار دۆکانی،
ممه‌لرین قند ساتار.

عزیزیم یامان قاشلار،
وئرمه‌دی آمان قاشلار.
صف چکین کیرپیکلره،
سایه‌دیر کامان قاشلار.

او تای بو تایا باخار،
آرخاسیندان چای آخار،
چؽخسین گؤزلریم، اگر
سنسیز دۆنیایا باخار.

گؤی اۆزو دامار-دامار،
آی باخار خومار-خومار.
دئ، نه وار گؤزلرینده،
هر گؤرن بیر پای اومار؟

داغ باشیندا یار آشار،
یار دولانار، یار آشار.
عیشوه، غمزه، بیر ده ناز،
تک بیر سنه یاراشار.

گؤی اۆزو دامار-دامار،
آی باخار خومار-خومار.
گؤزون جلّادا اوخشور،
باخان مرحمت اومار.

گئدیرسن هارا، دیلبر؟
قاش-گؤزو قارا دیلبر.
رحمین اولسون گل ائیله،
دردیمه چارا، دیلبر.

گؤی اۆزو دامار-دامار،
آی باخار خومار-خومار.
بی‌وفا یار یولوندا
دوغراندیم دامار-دامار.

گل چؽخما داغا، دیلبر،
قورخوم وار یاغا، دیلبر!
گۆلون بیر عؤمرو یوخدو،
بزکدی باغا، دیلبر!